Жаңа оқу жылы қарсаңында балаларға мектеп құралдары табысталды
Қызылорда облысы бойынша меншікті тілші
Жаңа оқу жылы қарсаңында Қызылорда ЖТ бөлімшесі бойынша теміржолшылар «Мектепке жол» атты республикалық акция аясында әлеуметтік маңызы бар игі іске үлес қосты.
Іс-шара шеңберінде әлеуметтік жағынан аз қамтылған және көп балалы, халықаралық оқушылар арасында өткізілетін жарыстардың үздіктері, толық емес отбасы мүшелері, қолдауды қажет ететін әлеуметтік санаттағы теміржолшылар отбасыларының балаларына мектепке қажетті құрал-жабдықтар салынған сөмкелер үлестірілді.
Жыл сайын өтетін дәстүрлі бұл қайырымдылық шарасы аясында бөлімшенің шалғайдағы 4 және 5-кластық станцияларында еңбек ететін теміржолшылардың балалары назарға алынды. Мәселен, 10 балаға мектепке арналған сөмкелер тапсырылса, жалпы «Aманат» партиясы мен кәсіподақ ұйымының атынан 20 мектеп сөмкесі таратылды. Барлық сөмкелер оқу құралдарымен толықтай жабдықталған.
«Бұл шараның мақсаты – балалардың мектепке толыққанды дайын болуына жағдай жасау, білімге деген ынтасын арттыру, сондай-ақ теміржолшылар қауымына моральдық әрі материалдық қолдау көрсету», – дейді Қызылорда бөлімшесі кадр бөлімінің басшысы Орынкүл Нұрмашқызы.