Маңғыстау локомотившілері қысқы сынаққа сақадай сай
Маңғыстау облысы бойынша меншікті тілші
Жайма шуақ жаздың жайлы күндері аяқталып, күз келді. Алда қаһарлы қыс тұр. Қатал маусымға ертерек қам жасайтын теміржолшылар әлдеқашан қарекетке кірісіп кеткен.
Түбектік теміржолшылардың да қарбалысы артқан. Әр мекеме өзіне қажетті құрал-саймандары мен техникасын сайлап, қысқа дайындық жасауда. Жолшылар жолдың кем-кетігін түзеп, локомотившілер отарбасын майлап, жағармайын қамдап жатыр.
Шаруашылықтың қысқа дайындығын пысықтайтын күзгі комиссиялық байқау да басталып кетті. Маңғыстау локомотив депосында биыл комиссиялық байқаудан отызға жуық тепловоз өтеді. Депоның пайдалану паркінде жалпы 42 тепловоз бар болса, соның 28-і комиссиялық байқауға қатысады. Оның ішінде 14 дана 2ТЭ10МК сериялы, 13-і ТЭМ сериялы, тағы біреуі ТЭ33А сериялы тепловоздары. 2ТЭ10МК, ТЭ33А сериялы тепловоздар күздік комиссиялық байқаудан Мақат, Шалқар, Сексеуіл жөндеу деполарда өткізіледі. Ал ТЭМ сериялы тепловоздары болса жергілікті «Ғасыр-Маңғыстау» ЖШС жөндеу депосынан күздік байқаудың дайындығын алады.
– Бүгінге дейін күзгі комиссиялық байқауға үш тепловоз ағытылды. Оның екеуі ТЭМ сериялы, біреуі 2ТЭ10МК сериялы тепловоз. Екеуі комиссиялық байқаудың дайындығын алып шықты. Біреуінде әлі жүріп жатыр. Сонымен қатар локомотив бригадаларының күшімен ТЭМ сериялы төрт тепловоз толық сырланды. Қалған тепловоздарға қатысты жұмыстар да жоспарға сай жүріп жатыр.
– Депода барлығы 42 тепловоз бар, оның 25-і 2ТЭ10МК сериялы, 12-сі ТЭМ-2 сериялы, 2-і ТЭМ-18 сериялы, 2-і ТЭМ-11А сериялы және 1 дана ТЭ33А жолаушылар/ жүк пойыздарын тартатын тепловоздар. ТЭМ сериялы тепловоздар маневрлық қозғалысқа пайдаланылады. 2ТЭ10МК сериялы тепловоздары пайдалану мерзімі аяқталып қалғандықтан олар бірте бірте пайдаланудан алынып жатыр. Келер жылдың жартыжылдығында жүруін толықтай тоқтату туралы тапсырма бар. ТЭМ-11А сериялы биыл келген су жаңа тепловоздарымыз да бар. Алдағы уақытта тағы да 2 дана ТЭ36 жүк тепловоздары беріледі деген бұйрық бар. Сондықтан қазір Балқаш депосында Маңғыстау мен Бейнеу айналым депосынан машинист нұсқаушысы мен машинистер осы ТЭ36 тепловозын оқып үйренуге іс-сапарда жүр. Осылай пайдалану паркін бірте бірте жаңа тепловоздармен жаңартып жатырмыз, - дейді Маңғыстау локомотив пайдалану депосының жөндеуді бақылау бөлімінің бастығы Сәбит Зияев.