Адал еңбек өтеуі – абыройлы демалыс

Маңғыстау локомотив пайдалану депосының басшылығы мен ұжымы еселі еңбегі мен адами қарым-қатынасымен сый-құрметке ие болған екі бірдей әріптесін зейнеткерлік демалысқа шығарып салды.

Қандай мекеме болса да жеті өлшеп, бір кесетін, кіріс пен шығысын бағамдап, сауатты есеп-қисап жүргізетін маманды іздейді. Ал қарапайым жұмысшыға жалақысының дер кезде есептеліп, қаражаттың қалтасына уақытылы түскені маңызды. Мұның бәрі қаржы маманының жұмысына жауапкершілігі мен білім, біліктілігіне байланысты десек, артық болмас. Депоның бас есепшісі Құралай Чукенова осы талап үдесінен шыға білген мықты маман ретінде танылғалы талай жыл. Темір жолдағы кейінгі жиырма жылға жуық еңбек жолында тек қана осы депоның мүддесі үшін қызмет еткен оның қиын-қыстау кезеңде тығырықтан шығатын жол таба білетін қасиетін басшылық әлдеқашан мойындаған. Қанша жыл мекеме бюджетін құлдыратпай ұстап, ұжымның көңілінен шыға білген, бірінші кезекте жұмыскерлердің еңбекақысын уақытылы алуына жағдай жасауға тырысатын «басбухты» машинистер де сыйлайды.  

  –  Құралай Көшкінбайқызының салаға сіңірген еңбегі мен өз ортасындағы беделі зор. Біреуге сырлас дос, біреуге қамқор апа-қарындас ретінде қолдан келсе бәріне қолдау білдіріп, қол ұшын созатын адамгершілік қасиетімен ортаға сыйлы бола білген жан. Темір жолдағы еңбек жолын Маңғыстау электрмен жабдықтау дистанциясында экономист болып бастаған. Біздің депоға 2007 жылы салық жөніндегі есепші болып келген еді. Кейін жоспарлау-экономика бөлімінің бастығы, бас есепші қызметтерін атқарды. Өзін мықты ұйымдастырушы, іскер де білімді маман ретінде көрсете білді. 2018 жылы «Үздік маман» атанды. Мұндай мықты маманмен қоштасудың өзі қиын, десек те талай жылғы қызметі үшін айтарымыз тек қана алғыс, дені сау болып, енді еңбегінің жемісін жесін! – дейді Маңғыстау локомотив депосы кәсіподағының төрағасы Әбілсейт Набиханов.  

Депо ұжымы сонымен қатар өткен аптада Бейнеу айналым депосында еңбек еткен тағы бір мықты маманды зейнетке жіберді. Бейнеу депосына талай жыл маңдай терін төккен депо кезекшісі Нағидулла Туленовке қазақи дәстүр бойынша иығына шапан жауып, жоғары басшылықтың арнайы алғысын табыстап, үлкен құрметпен демалысқа шығарып салды. Бейнеу айналым депосында көмекші машинист, тепловоз машинисі болып талай жыл тер төккен ол соңғы онжылдықта   жедел техникалық есептеу бөлімінде оператор, таспа талдаушы инженер, депо кезекшісінің көмекшісі, депо кезекшісі міндеттерін атқарған. Әріптестерінің айтуынша, қай қызметте де  өзінің жауапкершілігі мен еңбекке адалдығы арқасында құрмет-қошеметке бөленіп, айналасына сыйлы болды.