Түбекке су жаңа тепловоздар келді

Қарт түбектің халқы түгел көшеге шыққандай қуанышты күн болды. Маңғыстау темір жолына зауыттан жаңа шыққан қос бірдей тепловоз келіп, қаумалаған жұрт шашу шашып, ақсақалдар бата беріп қарсы алды.  

Бәйгеге түсуге дайындалып бабына жеткен тұлпардай жасанған ТЭ36А сериялы №8001, №8002 тепловоздардың тұсауы кесіліп,  салтанатты түрде  Маңғыстау локомотив депосының паркіне қабылданды.

Астанадан арнайы келген қонақтар қатарында «ҚТЖ-Жүк тасымалы» ЖШС бас инженері Марлен Көкрекбаев, Локомотив шаруашылығы департаментінің директоры Константин Цой, Локомотив шаруашылығы департаментінің бас инженері Арман Садықов түбек теміржолшыларының қуанышына ортақтасып, Компанияның тек  Маңғыстауда ғана емес, өзге де өңірлерде локомотив паркін жаңарту бағытында ауқымды жұмыс жүргізіп жатқанын жеткізді. Күні кеше Қарағандының Жаңарқа паркі де су жаңа локомотивпен толыққаны сөз болды.    

Белгілі болғандай, су жаңа тепловоздар күні ертең-ақ жолға шығып,10 күндік сынақпен жүреді. Талаптардан сүрінбей өтсе, 11-күні хатамма жүзінде шешім қабылданып, толықтай эксплуатацияға рұқсат беріледі. Сынақты «ҚТЖ-Жүк тасымалы» ЖШС Локомотив шаруашылығы департаментінің бас маманы Иван Костыря мен тепловоз машинисі Саламат Жаманбаев, машинист нұсқаушы Жұмабек Аселов бірлесе жүргізеді. Тепловоздар алғашқы сынақ сапарын Маңғыстау – Бейнеу телімі аралығында өтеді. Нәтижесі жақсы көрсеткішті көрсетсе, Маңғыстау локомотив пайдалану депосы болашақта тағы да осы сериядағы 20 тепловоз алуы жоспарланған.    

– Бұл ТЭ36А сериялы тепловоздар 2024 жылдың қазан айында Қытайдың CRRC Dalian Co Ltd компаниясында өндірілген. Аталған тепловоздың өзге тепловоздардан артықшылығы – іштен жану қозғалтқыш күшінің көптігімен дөңгелек жұбының үлкендігі.  Яғни қарапайым тепловоздардың іштен жану қозғалтқыш күші 3300 кВт болса, жаңа сериялы тепловоздың іштен жану қозғалтқыш күші – 3600 кВт. Қарапайым тепловоздардың дөңгелек жұптарының диаметрі 1050 мм болса, жаңа сериялы тепловоздың дөңгелек жұптарының диаметрі 1250 мм. Тепловоздардың басқару кабиналары толықтай ауа салқындатқышпен жабдықталған, кабинада тоңазытқыш пен қысқатолқынды пештер орнатылған, – деп сипаттама берді Маңғыстау локомотив депосының жөндеуді бақылау бөлімі бастығы Сәбит Зияев.  

ТЭ36А сериялы жаңа тепловоздарды басқару үшін түбектік машинистер алдын ала Балқаш депосында оқып келген.