Арыста Alstom серіктестігімен жаңа өндірістік кешен салынуда
Түркістан облысы бойынша меншікті тілші
Арыс қаласында француздық «Alstom» компаниясымен бірлесіп жұмыс істейтін қазақстандық «Электровоз құрастыру зауыты» ЖШС тағы бір өндірістік кешеннің құрылысын жүргізуде. Бұл жоба өңірдің индустриялық әлеуетін арттырып, жаңа жұмыс орындарын ашуға зор мүмкіндік береді.
Электровоздарға қызмет көрсететін сервистік орталық ретінде салынып жатқан нысанның жалпы құны 3,5 млрд теңгені құрайды. Кәсіпорын іске қосылғанда 100-ден астам тұрақты жұмыс орны ашылады деп жоспарланған. Ал зауыттың жалпы аумағы 2,9 гектарды қамтиды. Сонымен қатар мұнда теміржол құрамдарына техникалық және сервистік қызмет көрсету бағыты да дамытылады.
Жалпы, бұл инвестициялық бастама Түркістан облысының әкімі Нұрлан Көшеровтің төрағалығымен 2025 жылғы 20 сәуірде өткен өңірлік кеңес отырысында мақұлданған болатын. Кеңес хаттамасына сәйкес жоба «Бизнестің жол картасы-2025» мемлекеттік бағдарламасы аясында электр желілерін тарту және инфрақұрылыммен қамтамасыз ету бағытында қолдауға ие.
Қазіргі уақытта «Қазақстан темір жолы» ұлттық компаниясынан электр желілеріне қосылуға техникалық шарттар алынды. Сондай-ақ су, кәріз және газ жүйелеріне қосылуға қажетті техникалық рұқсаттар рәсімделіп, жобалық-сметалық құжаттамалар әзірленуде. Аталған құжаттар мемлекеттік сараптамадан өткен соң, «Өңірлік үйлестіру кеңесіне» ұсынылып, бюджеттік қаржыландыру тетігі арқылы инфрақұрылымды дамыту жоспары жүзеге аспақ.
Жуырда жергілікті билік органының өкілдері құрылыс алаңына барып, нысандағы жұмыс қарқынымен танысты. Қазіргі таңда инженерлік жүйелерді тарту бойынша барлық қажетті техникалық шарттар алынып, сәулет-жоспарлау тапсырмалары толық рәсімделген.
Қала әкімі Қайсар Маңқараев құрылыс жұмыстарының сапалы әрі уақытылы орындалуын қадағалау мақсатында жауапты тұлғаларға нақты тапсырмалар беріп, мемлекет тарапынан қажетті қолдау толық көрсетілетінін атап өтті.
Айта кетсек, Alstom – теміржол көліктерін, соның ішінде локомотивтер мен жоғары жылдамдықты пойыздарды өндіретін әлемдегі жетекші компаниялардың бірі. Француздық серіктестікпен бірлескен бұл жоба Қазақстанның теміржол саласындағы технологиялық дамуына тың серпін бермек.
Аталған жоба Арыс қаласының ұлттық цифрлық инвестициялық платформасында ресми түрде тіркеліп, «Электровоздарға сервистік қызмет көрсету орталығы» ретінде өңірдің ірі өндірістік нысандарының біріне айналмақ.