Атырау станциясының үздік маманы зейнет демалысына шықты
Атырау облысы бойынша меншікті тілші
Өмір бойы еткен еңбегіңнің өтеуі ретінде зейнет демалысына шығудың өзі бір бақыт. Атырау станциясының ұжымы осынау мерейлі жасқа жеткен қадірлі жанды зейнеткерлікке шығарып салды.
Фаризат Құрмашева Атырау станциясында тасымал құжаттарын өңдеу операторы болып 1985 жылдан бері табан аудармастан еңбек етіп келді. Қырық жылдан астам уақыт ішінде ол өз жұмыс орнында талай құжаттарды өңдеп, еңбектің қиындығымен қатар қызығын да бастан өткерді. Алғашқы жылдары көп жұмыс қолмен жасалды. Ал жаңа технологиялар өндіріске дендеп енген соң, ол заман талабына сай компьютерді меңгерді. Әріптестерінің айтуынша, операторлар ішіндегі ең «ширағы». Кейде бір тәулікте станцияға келіп-кетіп жатқан 10-12 пойыздан 500-ге дейін құжат өңдеген кездері болыпты.
Фаризат – «Үздік маман», «Адал еңбегі үшін» төсбелгілері мен басқа да марапаттар иесі. Жолдасы Құлмағамбетов Төлепберген де темір жолда машинист болып ұзақ жылдар еңбек етті. Бүгінде қос теміржолшы қыздарын ұзатып, жиендерінің қызығын қызықтап, бақытты ғұмыр кешуде.
Станция бастығы Бекжан Жиенбетов Фаризат Мақсатқызын ұжым алдында зейнетке шығуымен құттықтап, оның өлке темір жолына сіңірген еңбегін жоғары бағалап, Алғыс хат пен бағалы сыйлық табыс етті. Ұжымдастары ұзақ жыл үзеңгілес болған әріптестерімен қимай қоштасып, көп жылғы еңбегінің зейнетін көруді, отбасында бақытқа кенеле беруін тіледі. Жүрек бейнесіндегі үлкен гүл десте жасап, әсем әуенмен шығарып салды.