Шар станциясында «Заң керуені» республикалық акциясы өтті
Абай облысы бойынша меншікті тілші
«ҚТЖ» ҰК» АҚ Семей магистральдық желі бөлімшесі «Заң мен тәртіп» тұжырымдамасы аясында жыл басынан бері елеулі іс-шаралар өткізді.
Мәселен, жуырда бөлімше қызметкерлері Абай өңірлік көлік прокуратурасымен бірлесіп теміржолшылардың құқықтық мәдениетін арттыру жолында Шар станциясында «Заң керуені» республикалық акциясын өткізді.
Аталған акцияның мақсаты – теміржолшылардың құқықтық сауаттылығын арттыру, сала қызметкерлерінің құқықтары мен заңды мүдделерін қорғау, сондай-ақ еңбек заңнамасы бұзушылықтарының алдын алу.
Семей филиалы бастығының бірінші орынбасары Ғабит Есқожановтың төрағалығымен өткізілген іс-шара аясында «Қамқор Локомотив» ЖШС, ТД-17 айналым депосының машинистері мен олардың көмекшілері, вагон шаруашылығы және Шар станциясы еңбек ұжымдарының сұрақтарына заңнама аясында жауап беріліп, құқықтық түсіндірмелер жүргізілді. Теміржолшылар қауымы көлік прокурорынан көкейде жүрген өзекті сауалдарына жауап қана емес, мәселелерді шешу жолында бағыт-бағдар, кеңес те ала алды.
Жалпы, бүгінде Семей теміржолында заң үстемдігін сақтау басты мәселелер қатарында тұр. Бұл ретте қазіргі таңда сыбайлас жемқорлық, алаяқтық, еңбек даулары немесе өндірістік қауіпсіздік мәселелері бойынша хабарласуға арналған сенім телефоны мен электрондық пошта жұмыс істейді.
– Жалпы, темір жолдағы «Заң мен тәртіп» тұжырымдамасы бұл бірінші кезекте жолаушылар мен жүк тасымалының қауіпсіздігін, көлік инфрақұрылымдарының амандығын және құқықтық тәртіпті қамтамасыз ететін негізгі қағидат саналады. Сонымен қатар еңбек қатынастарын реттеп, кейбір даулы мәселелердің өзара шешім табуына да септігін тигізеді. Ал осындай іс-шараларды тұрақты түрде өткізу желі бойындағы заңның үстемдігін нығайтып, теміржолшылардың құқықтарын қорғауды қамтамасыз етуге бағытталады, – дейді Семей магистральдық желі бөлімшесінің кадр бөлімінің басшысы Данияр Баймағұлов.