Ел дамуының стратегиялық бағыты
Ақтөбе облысы бойынша меншікті тілші
Ақтөбеде алдағы республикалық референдумның ережелерін түсіндіру бойынша ауқымды кездесу өтті. Лауазымды тұлғалардың қатысуымен өткен іс-шарада мемлекет дамуының стратегиялық бағыты ретінде конституциялық реформалардың мазмұны талқыланды.
Қазақстан Республикасының Мемлекеттік кеңесшісі Ерлан Қарин спикерлік еткен талқылауға «Әділ және прогрессивті Қазақстанның Халықтық Конституциясы үшін» жалпыұлттық коалициясының өкілдері, «ҚТЖ» ҰК» АҚ басқарма төрағасы Талғат Алдыбергенов, облыс әкімі Асхат Шахаров, сондай-ақ Ақтөбе теміржол бөлімшесі мен Ақтөбе рельс арқалық зауытының еңбек ұжымдары қатысты.
Мемлекеттік кеңесші теміржол саласы қызметкерлерінің ұлттық экономиканың тұрақтылығын қамтамасыз етудегі маңызды рөлін атап өтті. Ол Негізгі Заңның жаңартылған редакциясының жобасы мемлекеттік саясаттың әлеуметтік бағдарлануын күшейтетінін, еңбек құқықтарын қорғаудың қосымша кепілдіктерін бекітетінін және еңбек адамының мәртебесін арттыратынын алға тартты.
Қорытындылай келе, кездесуге қатысушылар Конституцияға ұсынылған өзгерістер мемлекеттің азаматтар алдындағы жауапкершілігін нығайтуға және елдің ұзақ мерзімді дамуы үшін берік құқықтық негіз құруға бағытталғанын атап өтті. Соңында «сұрақ-жауап» форматында ашық диалог болды.
Мәртебелі қонақтар Ақтөбе рельс арқалық зауытын аралап көріп, отандық өнім өндірісімен танысты.
«ҚТЖ» ҰК» АҚ басқарма төрағасы Талғат Алдыбергенов өңірдегі теміржолшы ардагерлермен кездесіп, сала дамуына қосқан өлшеусіз еңбектеріне алғыс айтты. Қазақ теміржолының тарихын жасаған майталмандарды марапаттаған компания басшысы: «Сіздердің тәжірибелеріңіз – біз үшін ең бағалы қазына», – деді.
Ақтөбе ЖТ бөлімінің басшысы Бөріхан Беркімбаев аймақ теміржолының бүгінгі жағдайы мен алдағы жоспарлары жайында баяндады. Теміржол инфрақұрылымын жаңарту, жүк тасымалының тиімділігін арттыру және әлеуметтік мәселелерді шешу бағытындағы жұмысқа тоқталды.