Жамбыл филиалының еңбекқор арулары
"Қазақстан теміржолшысы" газетінің Жамбыл облысындағы меншікті тілшісі
«ҚТЖ - Жүк тасымалы» ЖШС Жамбыл филиалының түрлі құрылымдық бөлімшелерінде табысты еңбек етіп жүрген әйелдер көп. Олар кеңседе ғана емес, жүк тасымалы қызметінде жауапты әрі ауыр жұмысты табандылықпен атқарып келеді. Мереке қарсаңында филиал директоры Айдын Сеитбенбетов теміржолшы қыз-келіншектерді құттықтап, Алғыс хаттармен марапаттады.
– Кешегі алғашқы паравозшы Жәбира Жүсіпова секілді аналарымыздың еңбек жолы – нәзікжандылардың ауыр жұмысты да ерлермен қатар еңсере алатынын көрсетті. Әйелдер Қазақстан темір жолында пойыздар қозғалысынан бастап, жүк айналымына жауапты, инфрақұрылымға техникалық қызмет көрсету, құжаттарды реттеу, стратегиялық жоспарлау, тағы сол сияқты кеңседегі жұмыстарды үлкен жауапкершілікпен атқаруда. «ҚТЖ – Жүк тасымалы» ЖШС Жамбыл филиалында да өз міндетіне адал, табанды қыз-келіншектер баршылық. Бүгін міне, солардың бір парасы осында жиналды. Ару, Ана, Әйел – өмірдің мәні ғана емес, өмірдің өзі! Көктемнің ізгілік пен мейірім тұнған мерекесі құтты болсын!, – деген Айдын Пайзылдаұлы мереке иелеріне кәсіподақ ұйымы атынан сый-сияпат жасады.
Бұл күні филиал ұжымы, жалпы Жамбыл жол бөлімшесі теміржолшы әйелдерге ерекше құттықтау ұйымдастырғанын айта кеткенін жөн. Таңертеңгі уақытта кеңсеге асығып жеткен нәзікжандыларды филиал директоры Айдын Пайзылдаұлы бастаған ер азаматтар сән-салтанатпен күтіп алып, гүл шоқтарын сыйлады. Ақ тілектер марафонын ашып, әр бөлімдегі мереке иелеріне жылы лебіздерін жеткізіп, сый-құрмет көрсетті.
Мұндай іс-шаралар филиалға қарасты барлық құрылымдық бөлімшелерде жалғасын тапты. Жалпы әлеуметтік көңіл күй әйелдің қас-қабағынан басталатыны – өмірдің дәлелді қажет етпейтін аксиомасы екенін көктем мерекесі айғақтай түскендей болды.
