Теміржолшылар ұлттық спорт түрлерінен сынға түсті
Маңғыстау облысы бойынша меншікті тілші
Маңғыстауда ұлттық спорт күніне арналған жарыстар мәресіне жетті. Соның ішінде Бейнеу станциясында өткен ұлттық ойындар бәсекесі ерекше тартымды да тартысты өтті.
Спорт нұсқаушыларының ұйымдастыруымен Бейнеуде ерлер мен әйелдер арасында өткен садақ ату сайысына қатысушылар қатары көп болды. Бұл спорт түрі соңғы жылдары маңғыстаулық теміржолшылар арасында қарқынды дамып келеді. Түбектен әлемдік деңгейдегі додаларға шығып, жеңімпаз болып жүрген теміржолшылар да бар. Бейнеудегі жарыста ер азаматтар арасынан ТД-2 айналым депосынан Жайлау Жалғасбаевтың садағы нысанаға дәл тиіп, бірінші орынды иемденді. Екінші орынды Бейнеу жол дистанциясынан Бауыржан Нұрбергенов алса, үшінші орын Құрық портынан келген Мейрамбек Арқалықовқа бұйырды. Әйелдер арасынан да айналым депосынан Камила Әбілқайыроваға тең келер мерген болмады.
Бейнеу жол дистанциясында өткен арқан тартудан бірінші орынды дистанция алса, екінші және үшінші орындар айналым депосы мен станция ұжымына бұйырды. Асық атуда ешкім жол дистанциясының жұмысшысы Қуаныш Бисенбаевтың алдына түсе алмады. Екінші орынды вагон депосынан Тұрар Ниязов, үшінші орынды қалпына келтіру пойызынан Болатбек Байғабылов алды. Ләңгі тепкендер арасында Тұрар Ниязов бірінші орынға жайғасты. Екінші және үшінші орындарды Ислам Құрманбаев пен Болатбек Байғабылов өзара бөлісті.