Түрксіб саябағындағы серуен
"Қазақстан теміржолшысы" газетінің Жамбыл облысындағы меншікті тілшісі
Жамбылдық теміржолшылар Тараз қаласы Түрксіб саябағындағы шағын этноауылда ізгілік пен еңбек мерекесі – Ұлыстың ұлы күнін ұлттық ғұрыптық дәстүрлерге сай сән-салтанатпен атап өтті.
«ҚТЖ – Жүк тасымалы» ЖШС Жамбыл филиалы және Жамбыл магистральдық желі бөлімшесіне қарасты құрылымдық мекемелер ақшаңқан алты киіз үй тігіп, наурыз көже, бауырсақ пісіріп, теміржолшыларға арнап ақ дастархан жайды.
Ән әуелеп, күй күмбірлеген этноауылдағы Наурыз тойын бесікке салу, тұсаукесер, беташар дәстүрлерін жаңғыртып, көрініс көрсеткен ВЧД-27 Жамбыл вагон пайдалану, ТЧЭ-31 Жамбыл локомотив пайдалану депосы мен ЭЧ-21 Жамбыл электрмен жабдықтау дистанциясының қызметкерлері қыздыра түсті.
Жігіттер жағы арқан тартыста кім мықтыны анықтаса, ерлер мен әйелдер арасындағы қол күресте бәсеке қыза түсті. Тоғызқұмалақ жарысы да тартысты өтті. Ұлттық спортты ұлықтаған теміржолшылар мен жеңімпаздар Алғыс хаттармен марапатталып, кәсіподақ ұйымының атынан сый-сияпатқа ие болды.
«ҚТЖ – Жүк тасымалы» ЖШС Жамбыл филиалының директоры Айдын Сеитбенбетов пен «Қазтеміржолкәсіп» ҚБ Жамбыл филиалының төрағасы Ерболат Жидебаев Тараз қалалық көпса лалы балалар ауруханасының «Қамқор» оңалту орталығындағы балалардың тұсауын кесті. Қамкөңіл аналардың көңілін көтеріп, ем алушы бүлдіршіндердің болашағы жарқын болсын деген үміт-ниетпен ұйымдастырылған тұсаукесер рәсімінде Наурыз мейрамына сыйлықтар тарту етті.
– Оңалту орталығы атауының өзі айтып тұрғандай, мұнда келіп, ем қабылдайтын балалар, олардың ата-аналары да қоғамнан қамқор көңіл күтеді. Балаларымыз денсаулығы түзеліп, қатарға қосылып кетсе деп үміт етеді. Наурыз мерекесінде тұсаукесер рәсімін өткізуі осындай үлкен арманмен жалғасып жатыр. Сондықтан «Қамқор» оңалту орталығының шақыруын қабыл алып, бүлдіршіндерді қуантқымыз келді, – деді Айдын Пайзылдаұлы.
Мерекелік іс-шаралар Жамбыл жол бөлімшесіндегі мәжіліс залында жалғасын тауып, Ұлыстың ұлы күніне орай бір топ теміржолшыларды марапаттау рәсімі өтті. Ал кешке қарай Түрксіб саябағындағы жаппай серуенге ұласты.