Атырау теміржолшылары Ұлыстың ұлы күнін атап өтті

Атырау жүк тасымалы және магистральдық желі бөлімшелеріне қарасты құрылымдық мекемелер кәсіподақ ұйымының қолдауымен Ұлыстың ұлы күні – Наурыз мерекесін атап өтті.

Ақжайық станциясының алдындағы кең алаңға киіз үйлер тігіліп, Жүк тасымалы мен Магистральдық желі бөлімшелерінен бөлек қала басындағы станциялар, жол, электр, байланыс дистанциялары, вагон, локомотив деполары және «Қазтеміртранс» АҚ филиалы да өз алдына үй құрды. Соған сәйкес халық та көп жиналып, биыл сала ардагерлерінің қатысуы да молынан байқалды.  

Халықтық сипат алған шараны қос бөлімше басшылары мен ардагерлер кеңесі төрағалары құттықтау сөзбен ашып, жетістіктерге тоқталып, наурыздан наурызға аман жетуді тіледі. Бір-бірін көптен көрмеген дария кеуде, тау мүсін қариялар мен кимешек киген әже-аналар көрісіп, шұрқырасып жатыр. Орта және жас буын өкілдері сәнді де жарасымды ұлттық киімде. Теміржолшылардың өз күшімен даярланған мерекелік концерт те тыңдармандарға шуақты көңіл-күй сыйлады. «Ел іші – өнер кеніші» демекші әнші де, күйші, биші де теміржолшылардың өздері, өнер жұлдыздарынан бір кем емес. Өнерпаз жастар мерекеге жиналған қонақтардың көңілін көтеріп тастады.  

Әр киіз үйдің ішінде ақ дастархан жайылып, сырнайлатқан-кернейлеткен әншілер мен күйшілер өнер көрсетіп жатты. Ақжарма тілектер легі ағытылып, үлкендер бата берді. Наурыз көже, құрт-май, жент, сүзбе, қымыз бен шұбат, басқа да ұлттық тағамдар қай киіз үйде де мол болды. Ағаштан ойып жасалған және зергерлік ұлттық бұйымдар жәрмеңкесі де өтті. Далада алтыбақан тебіліп, ұлттық ойындар ойналды. Кір тасын көтеру, арқан тарту, асық ату және ләңгі тебу бойынша жарыс ұйымдастырылып, тойдан тобықтай демекші, сый-сияпатсыз қалған ешкім жоқ.