Ұлық мереке көркі – ұлттық ойындар
"Қазақстан теміржолшысы" газетінің Жамбыл облысындағы меншікті тілшісі
«Әскерилендірілген теміржол күзеті» ЖШС Тараз филиалының қызметкерлері жыл сайын Ұлыстың ұлы күнінде ұлттық ойындарды жаңғыртып, арқан тарту, асық ату, қол күрестен ішкі біріншілік өткізуді дәстүрге айналдырған.
Биыл да сол үрдісті жалғастырып, ұлттық ойындардан өткен жарыс соңы Наурыз тойына ұласты.
– Ұлыстың ұлы күніне орай Тараз филиалының әр атқыштар командасы арасында ішкі чемпионат ұйымдастырып, ұлттық ойын спортын насихаттадық. Арқан тарту, асық атудан жарыс аса тартысты өтті. Сондай-ақ ерлер командалары шағын футболдан бақ сынады. Сәуір айында әйелдер арасында қол күресінен республикалық біріншілік өткізеді. Бүгінгі іріктеуде топ жарғандар сол додаға жолдама ұтып алды. Бізде Сарышағандағы атқыштар командасында қыз-келіншектер көп, солар бүгін жақсы дайындықпен келіпті. Қарсылас шақ келтірмеді. Оларды өз салмақ дәрежесі бойынша жеңіске жеткен филиалдың әкімшілік қызметкері бастап барады. Арқан тартуда Түрксіб командасы үздік шықты. Ізгілік мерекесі – Наурыз тойының ұжымды ұйыстыра түскеніне тағы бір мәрте көз жеткіздік. Әр команда іс-шараның жоғары деңгейде өтуіне атсалысты, – дейді «Әскерилендірілген теміржол күзеті» ЖШС Тараз филиалының директоры Еркін Мүсілімов.
Еркін Түгелбайұлы мереке қарсаңында филиал қызметкерлерінің еңбекке деген құлшынысын арттырған жағымды жаңалықтар болғанын атап өтті.
«Наурыз мерекесіне орай барлық қызметкерлерге сыйақы берілді. Тағы бір атап өтетіні, әскерилендірілген теміржол күзетінің қызметін оңтайландыру, дер кезінде өз қызметін атқаруын жеделдету мақсатында автопарк жаңартылды. Республикалық аппараттан филиалға 7 Toyota Hilux көлігі берілетінін жария етті. Автокөліктердің кілтін мерекеден кейін әр атқыштар командасын шақырып, салтанатты түрде табыс ететін боламыз», – деп түсіндірді филиал директоры.
Наурыз көже пісіріп, ақ дастархан жайылып, ән мен күйге бөленген мерекелік іс-шарада «Әскерилендірілген теміржол күзеті» қызметінде адал еңбегімен көзге түскендер Алғыс хаттармен марапатталды. Спорттық ойындар жарысының жеңімпаздарына арнайы дипломдар мен сыйлықтар тапсырылды.