Межелі жұмыстар атқарылуда

Атырау магистральдық желі бөлімшесі басшылық қойған міндеттерді жүзеге асыру және бекітілген жоспарларды орындау мақсатында айтарлықтай жұмыстар атқаруда.

Биылғы алғашқы тоқсанда айлық көрсеткіштер бойынша пойыздардың қозғалыс қауіпсіздігі толық сақталып, апатты жағдай, пойыздардың аударылуы, өндірістік жарақат, басқа да келеңсіз оқиғалар тіркелмеген.  

– Бөлімше бойынша биылғы межеленген жұмыстар кезең-кезеңмен атқарылып келеді. 2026 жылы 30 шақырым, дәлірек айтқанда 29,732 км жолды күрделі жөндеу жоспарланған. Бүгінгі күні оның жартысына жуығы орындалды деуге болады. Сондай-ақ вокзал шаруашылығы бойынша 9 вокзал ғимаратында қайта жаңғырту жұмыстары жалғасуда. Биылғы жылдың бірінші жартыжылдығында Сағыз, Мақат, Доссор, Аққыстау, Исатай және Ганюшкино вокзалдарындағы жұмыстар аяқталады деп жоспарлап отырмыз. Қалған нысандар екінші жартыжылдықта пайдалануға беріледі, – дейді бөлімше директорының бірінші орынбасары Аманқос Жылқышиев.  

Сонымен қатар бөлімше бойынша инфрақұрылымды жақсарту, байланыс саласын модернизациялау бағытында ШЧ-8 Атырау, ШЧ-9 Ақжайық белгі беру және байланыс дистанцияларында станциялардың электрлік орталықтандыру кешенінде қызмет ету мерзімі өткен қуат панельдерін ауыстыру, станцияларда вокзал ғимаратын күрделі жөндеу жұмыстарының жүргізілуіне байланысты вокзал ішінде орналасқан электрлік орталықтандыру кешенін жаңа ғимаратқа көшіру жұмыстары жүргізілген.  

Атырау электрмен жабдықтау дистанциясы бойынша 2023-2027 жылдарға арналған жол картасына сәйкес, тұзды шөгінділерге ұшыраған учаскелерде электрмен жабдықтау нысандарының сенімділігін арттыру мақсатында ВЛ-10 кВ АБ ПЭС әуе желісінің темірбетонды бағандары, ШФ-10-нан ШС-20 изоляторларына, ПСО сымдары АС-35 сымдарына ауыстырылған.  

Бұған қоса биылғы жоспарға сәйкес алдағы уақытта 30 шақырым жолды күрделі, 9,2 шақырым жолды орташа жөндеуден өткізу, 20 дана бұрмаларды ауыстыру, 74,6 шақырым жол бойында малдың шығуына қарсы қоршау тұрғызу, Атырау қаласында орналасқан жаяу жүргіншілер көпірін жергілікті атқарушы органға тапсыру, т.б. жұмыстар көзделіп отыр.  

Ал Мақат станциясында орналасқан жаяу жүргіншілер көпірін жергілікті атқарушы органдардың құзыретіне тапсыру мақсатында барлық керекті құжаттар толығымен дайындалып, тиісті департаменттерге жіберілген.