Майдангер Иван Макеевке құрмет көрсетілді
"Қазақстан теміржолшысы" газетінің Жамбыл облысындағы меншікті тілшісі
Бейбіт елде өмір сүріп, тыныштықта өскен ұрпақ Ұлы Отан соғысы жылдарында майдан даласында от кешкен жауынгерлер мен тыл еңбеккерлерінің алдында қарыздар! Жыл сайын 9 мамыр – Жеңіс күні мерекесі қарсаңында ардагерлерді ардақтап, майдангерлердің рухына құрмет көрсетілетіні сондықтан.
Мереке қарсаңында «ҚТЖ – Жүк тасымалы» ЖШС «Жамбыл» филиалы директорының орынбасары Тұрсын Раймов, кадр бөлімінің бастығы Меруерт Баймұрзаева, филиалдың кәсіподақ ұйымы төрағасының орынбасары Серік Ақшораев Тараз станциясындағы желілік полиция бөлімінде өткен мерекелік іс-шараға қатысып, майдангер Иван Макеевті Жеңіс күні мерекесімен құттықтады.
Жеңіс күні мерекесіне орай ұйымдастырылған іс-шарада желілік полицияның жеке құрамы сапқа тұрғызылды. Қонақтар бөлім аумағындағы ҰОС ардагерлеріне арналған ескерткішке гүл шоқтарын қойды. Тараз станциясындағы желілік полиция бөлімінің бастығы, полиция полковнигі Олег Родякин ардагер Иван Федоровичті Жеңіс күні мерекесімен, жеке құрамды Отан қорғаушылар күнімен құттықтады.
Сонымен қатар, «ҚТЖ – Жүк тасымалы» ЖШС «Жамбыл» филиалы директорының орынбасары Тұрсын Раймов құттықтау сөз сөйлеп, майдангерге ізгі тілегін арнады.
– 9 мамыр – ерлік рухтың даңқы аспандаған күн! Отан үшін от кешкен майдангерлердің ерлігі ешқашан ұмытылмайды. Біз ардагерлерімізді әрқашан ардақтаймыз! Қатар келген мерейлі қос мерекемен баршаңызды, құттықтаймын! Дендеріңізге саулық, отбастарыңызға амандық, елімізге тыныштық тілеймін! – дей келе Тұрсын Мухамедұлы Иван Макеевке филиал атынан сый-сияпат тапсырды.
Соғыс жылдарында Қиыр Шығыстағы шайқастарға қатысып, бірнеше қаланы жаудан азат ету операцияларында ерлік көрсеткен Иван Макеевтің бейбіт күндегі еңбек жолы темір жол саласымен байланысты өріледі. Елге келіп, кәсіби білім алған соң Жамбыл станциясындағы желілік ішкі істер бөліміне жұмысқа орналасып, 30 жыл қызмет етеді. Подполковник шенінде зейнеттік демалысқа шыққан ардагер биыл 99 жасқа толып отыр.
«Отан соғысы» орденімен, «Германияны жеңгені үшін», «Жапонияны жеңгені үшін» мерекелік медальдарымен марапатталған ардагер Тараз станциясындағы желілік полиция бөлімінің жеке құрамымен бірге қан майданда қаза тапқан майдангерлерді бір минут үнсіздікпен еске алып, рухтарына тағзым етті.
Тараз станциясындағы желілік полиция бөлімінде Жеңіс күні мерекесіне орай сапқа қосылған жас сақшылардан Ант қабылдау дәстүрге айналған. Сондай-ақ бұл күні табысты еңбегімен көзге түскендерге шен беріліп, Алғыс хаттармен марапатталып отырады.
