Бір жұмысшы – бір өсімдік
«Қазақстан теміржолшысы» газетінің тілшісі
«Таза Қазақстан» экологиялық акциясы аясында Шымкент магистральдық желі бөлімшесі қызметкерлері «Бір жұмысшы – бір өсімдік» акциясын өткізді. Мұның мәні – әр жұмысшы өз жұмыс орнында бір өсімдік өсіріп, соны күтіп баптайды.
Маңызды акцияға әкімшілік корпустың барлық персоналы, станциялар, вокзалдар, құрылымдық бөлімшелер қызметкерлері, яғни 500-ден астам адам атсалысты. Нәтижесінде жұмыс орындарында қолайлы және жайлы жағдай жасалды. Атап айтқанда, ПЧ-53, ПЧ-54, ШЧ-37, ШЧ-38, ЭЧ24 мекемелерімен қатар Арыс, Сарыағаш, Түркістан, Текесу, Шымкент, Қазығұрт, Ленгір, Бадам, Манкент және басқа да станциялардағы кабинеттер гүл көшеттеріне толды.
– Эколог ретінде мен үшін гүлдер арасында жұмыс істеу – тек эстетика емес, кәсіби қажеттілік. Менің кабинетімде көптеген өсімдіктер, шамамен 45 құмыра гүл бар. Олар ауаны тазартып, оны оттегімен қанықтырып қана қоймай, сонымен қатар өнімді жұмыс істеу үшін дұрыс микроклимат жасайды. Бұл стресс деңгейін төмендетудің және кабинет ішіндегі ауаны жақсартудың ең оңай және тиімді әдісі екенін атап өту маңызды. Гүлдерге қарап, адам монитордан демалып, энергия алады, гүлдерді суару және күту арқылы аз да болса дене қозғалысын жасайды, бұл денсаулық үшін маңызды. Қорытындылай келе, «экология сіздің жұмыс үстеліңізден басталады» деп айта аламын. Егер әрқайсымыз айналамызда кішкентай оазис жасасақ, онда компаниядағы жалпы экологиялық мәдениет жақсы болады, – дейді аталған бөлімшенің еңбек қауіпсіздігі және еңбекті қорғау, өнеркәсіптік қауіпсіздік және экология қызметінің қоршаған ортаны қорғау жөніндегі жетекші инженері, экологы Ғалия Егізбаева.
Жұмыс орындарын көгалдандыру және абаттандыру жұмысы ұжымдардың экологиялық мәдениетін арттырудағы маңызды қадам болды.