Ақтөбеде биыл 56 шақырымнан астам жолға күрделі жөндеу жүргізіледі
Ақтөбе облысы бойынша меншікті тілші
«ҚТЖ» ҰК» АҚ Ақтөбе магистральдық желі бөлімшесінде жазғы жол жұмыстарын ұйымдастыруға арналған жиын өтті. Басшылық құрам мен салалық қызмет өкілдері қатысқан басқосуда 2026 жылға жоспарланған күрделі жөндеу, бағыттамалы бұрмаларды ауыстыру, сигнализация және байланыс құрылғыларын жаңарту жұмыстары талқыланды.
Ақтөбе магистральдық желі бөлімшесі директорының орынбасары Темірғали Куштаев жиында биылғы маусымда атқарылатын негізгі міндеттерге тоқталды. Жоспарға сәйкес мердігер мекеме «Теміржол жөндеу» мекемесінің күшімен 56,9 шақырымнан астам жолға күрделі жөндеу жүргізілмек.
– Негізгі жұмыстар Орал, Никельтау, Қандыағаш және Біршоғыр жол дистанцияларында жүргізіледі. Қандыағаш жол дистанциясында Бақай – Тоқмансай және 312-313 разъезд аралығындағы учаскелерде 25 шақырымнан астам жол күрделі жөндеуден өтеді. Никельтау – Жазық, Жилаево – Пойма, Құдық – Жем аралықтарында да теміржол инфрақұрылымы жаңартылады, – деді Темірғали Куштаев.
Сонымен қатар биыл 98 бағыттамалы бұрманы жаңасына ауыс- тыру жоспарланған. Оның ішінде Қандыағаш дистанциясына – 29, Ақтөбеге –20, Шалқарға 16 бағыттама орнату қарастырылған. Бірқатар учаскеде ескі бағыттамалар жаңартылып, орташа және күшейтілген орташа жөндеу жұмыстары жүргізіледі.
Жоспарға сәйкес ескі рельс желілерін ауыстыру, рельс дәнекерлерін қалпына келтіру, қоршау- ларды жөндеу, балласт қабатын терең тазарту, жол қисықтарын талапқа сәйкестендіру секілді жұмыстар да атқарылады. Қазіргі таңда бірқатар бағыт бойынша жоспар артығымен орындалған. Мәселен балласт қабатын тазарту жоспары 10 шақырым болса, іс жүзінде 11,4 шақырым орындалған. Теміржол қоршауларын жөндеу көлемі де жоспардан асып түсті.
Жиында сигнализация және байланыс шаруашылығындағы жұмыстарға да ерекше назар аударылды. Төрт ай ішінде құрылғыларды жаңарту, релелер мен электрқозғалтқыштарды ауыстыру, кабель желілерін жөндеу және техникалық сенімділікті арттыру бағытында ауқымды жұмыстар жүргізілген. Әсіресе Қандыағаш, Шалқар, Илецк және Орал учаскелерінде тозығы жеткен құрылғыларды жаңарту, монтаж жүйелерін біріздендіру және заманауи қауіпсіздік талаптарына сәйкестендіру жұмыстары кезең-кезеңімен атқарылуда.
Жиын барысында жазғы жол жұмыстары кезінде қозғалыс қауіпсіздігін қамтамасыз ету, жөндеу сапасын бақылау және жұмыстарды белгіленген мерзімде аяқтау мәселелері де қаралды. Басшылық тарапынан барлық құрылымдық бөлімшелерге жоспарланған жұмыстарды сапалы әрі уақытылы орындау тапсырылды.