«WorldSkills – 2026»: Тараздық студенттердің жетістігі
"Қазақстан теміржолшысы" газетінің Жамбыл облысындағы меншікті тілшісі
Жұмысшы және техникалық мамандықтарды даярлаудағы өзекті мәселелерді зерделеуге бағытталған «WorldSkills» жобасы – бүгінде кәсіби білім алған түлектердің бәсекеге қабілеттілігін салыстыру және бағалау алаңына айналған.
Жамбыл облыстық білім басқармасы ұйымдастырған «WorldSkills Jambyl – 2026» чемпионатында «Теміржол локомотивін басқару» құзыреттілігі бойынша кәсіби дағдыларын көрсетуге мүмкіндік алған Тараз теміржол көлік және коммуникация колледжінің студенттері Саидамир Әбдібек пен Алан Сариев жүлдегер атанып, үздік үштіктің қатарынан көрінді.
Болашақ теміржолшылар конкурста бәсеке жоғары болғанын айтады. Олар «WorldSkills» – тек қана конкурс емес, шеберлік дағдыларын жетілдіру және дамытуға мүмкіндік берген жоба екенін жеткізді.
– Байқауға дайындық барысында өз мамандығымызға деген қызығушылығымыз арта түсті. Теориялық білімімізді, кәсіби дағдымызды көрсету үшін көп іздендік. Чемпионатта әр мамандыққа арналған тапсырмалар беріледі. Оны нақты жұмыс орнында белгілі бір уақыт ішінде орындау керек, – дейді облыстық чемпионаттың жүлдегері, болашақ машинист Алан Сариев.
Студенттерді чемпионатқа бастап барған колледж директорының оқу-өндіріс ісі жөніндегі орынбасары Жеңіс Тайбеков жыл санап аталған шеберлік байқауына қатысушылар қатары артып келе жатқанын, конкурсқа қатысқан колледж студенттерінің жақсы нәтиже көрсеткенін атап өтті.
Жеңіс Мэлсұлының айтуынша, конкурстың облыстық кезеңінде түрлі жұмысшы мамандықтары бойынша бақ сынаған үміткерлер топтық жұмыс бойынша бірінші орын, жекелей сынға түскендердің төртеуі үшінші орынды олжалаған. Атап айтсақ, «Құтқару жұмыстары» құзыреттілігі бойынша «Төтенше жағдайда қорғау» мамандығының 1-3 курс студенттерінен жинақталған «Арлан» тобы жеңіс тұғырына көтерілсе, «Сұңқар» тобы үздік бестікті түйіндеді.
Ал «Сандық бағдарламамен басқарылатын станоктарда токарлық жұмыс» құзыреттілігі бойынша Арсен Оспан, «Дәнекерлеу технологиясы» құзыреттілігі бойынша Нұрислам Хасанов, «Теміржол локомотивін басқару» құзыреттілігі бойынша Саидамир Әбдібек және Алан Сариев үшінші орын жүлдегері атанған.