Қырағы вагон қараушы апаттың алдын алды

Маңғыстау вагон депосының Бейнеу станциясындағы техникалық қосынының вагон қараушысы пойыздар қозғалысына қауіпті ақауды анықтап, апаттың алдын алды.

Түнгі ауысымдағы міндетін атқару барысында Бейнеу станциясына Мақат бағытынан келген 2732 жұп пойызының құрамын техникалық тексеру кезінде вагон қараушы Еламан Тышқанбаев анықтаған ақау жүк құрамының 22-ші вагонынан табылды. Вагонның төртінші дөңгелек жұбынан күдікті байқаған ол тағы да анықтап қарап, ақауға көз жеткізген соң нұсқаулыққа сай сауатты әрекет етті.  

– Сағат шамамен түнгі 21-22-де Мақат бағытынан келген, Ақтау портына қарай жол жүретін құрамның вагондарын тексеріп жүріп вагон дөңгелегінде букстың жылжып кеткенін байқадым. Ішін ашып қарасам, букс торабы подшипниктері шашылып жатыр. Бұл біздің тілде салқын күйде букстың 30 мм жылжығанын және букстық тораптың бұзылуын білдіреді. Ақауды дереу тиісті адамдарға хабарлап, вагондар доңғалақ жұптарын ауыстыру үшін торға ағытылды, – дейді бейнеулік вагон қараушы Еламан Тышқанбаев.  

Жас вагон қараушының еңбегіне баға берген аға буын өкілдері оның өз міндетін ұқыптылықпен атқарып, сын сағатта жауаптылық танытқанын және нұсқаулыққа сай сауатты әрекет ете білгенін атап өтті. Бейнеу политехникалық колледжін теміржолшы мамандығы бойынша бітірген Еламанның бұл – алғашқы жеңісі. Екі ай сынақ мерзімінде болып, тәжірибелі вагон қараушылардан дәріс алған оның жеке-дара вагон қараушы міндетін атқаруға шыққанына бірнеше ай ғана болған.