Ақтөбедегі зауыт Р50 рельсін өндіруді бастады
Ақтөбе облысы бойынша меншікті тілші
Ақтөбе рельс-арқалық зауыты өнім түрін кеңейтті. Кәсіпорын Р50 санатындағы рельстерді өндіруді игеріп, сериялық өндіріске шығарды.
Өндірісі жолға қойылған ДТ350 және НТ260 санатындағы Р50 рельстері кәсіпорынның бір мезетте екі мемлекетаралық нормативтік құжаттың талаптарына сай келуіне мүмкіндік беріп, зауыттың экспорттық әлеуетін арттырады. Сәйкесінше, әртүрлі елдердегі тапсырыс берушілер үшін сенімді серіктес ретіндегі мәртебесін күшейтеді.
Р50 рельстері өнеркәсіптік кәсіпорындардың кірме жолдарында, карьерлер мен шахталарда, бағыттамалы бұрмаларда, станциялық және қосалқы жолдарда кеңінен қолданылады. Сонымен қатар олар арнайы науалы профильді қажет етпейтін трамвай желілерінің учаскелерінде де сұранысқа ие.
Жаңа өнім түрін игеру – кәсіпорынның өндіріс ауқымын кеңейтуге және Қазақстан мен ТМД елдері нарықтарындағы бәсекеге қабілеттілігін арттыруға бағытталған жүйелі жұмысының нәтижесі. Ақтөбе рельс-арқалық зауыты өндірісті әртараптандыру бағытын жалғастырып, теміржол саласының заманауи талаптарына сай жаңа өнімдерді кезең-кезеңімен игеруді жалғастыруда.