Келбеті келіскен вокзалдар көз тартады
Абай облысы бойынша меншікті тілші
Шығыстағы Семей теміржолының Ауыл және Белағаш станцияларындағы вокзалдар қайта жаңғыртылып, күні кеше пайдалануға берілді. Келбеті келіскен вокзалдар алыстан көз тартады.
Ауқымды жоба аясында жаңартылып, қайта түлеген қос вокзалдың ашылу рәсіміне Көлік вице-министрі Жәнібек Тайжанов пен «ҚТЖ» ҰК» АҚ басқарушы директоры Марат Есқалиев, облыс әкімі Берік Уәли және Семей магистральдық желі бөлімшесі басшысының вокзал шаруашылығы бойынша орынбасары Нұрлан Әзімханов қатысты.
Ауыл станциясындағы теміржол вокзалы 1929 жылы салынған. Жалпы, Ауыл – аймақтың көлік жүйесінде маңызды орын алатын, мол көлемде астық тиелетін станция. Жолаушы пойыздары да аз емес, халықаралық бағыттағы «Новосібір-Алматы» пойызы қатынайды.
Көлік вице-министрі Жәнібек Тайжанов өз сөзінде республика бойынша 124 вокзалдың жаңғыртылып жатқанын, соның ішінде екі нысан алғаш болып Абай облысында пайдалануға беріліп отырғанын атап өтті.
– Мемлекет басшысының тапсырмасымен елімізде 2025 жылдан бері теміржол вокзалдарын жаңғырту бағдарламасы жүзеге асырылуда. Ауқымды жоба еліміздің көлік инфрақұрылымын кешенді жаңартуға, жолаушыларға қызмет көрсету сапасын арттыруға және саяхат үшін заманауи, жайлы әрі қауіпсіз жағдайлар жасауға бағытталған, – деді ол.
Мәртебелі меймандар ғимарат ішін аралап көрді. Реконструкция барысында ескірген шатыр толық ауыстырылып, заманауи түрдегі ішкі және сыртқы әрлеу жұмыстары жүргізілген. Су, кәріз, жылу, электрмен жабдықтау, желдету және кондиционер жүйелері жаңарған. Перрондар қайта жөнделіп, іргелес аумақтар абаттандырылған. Басты ерекшелік – мүмкіндігі шектеулі азаматтарға қолайлы жағдай жасауға көңіл бөлінген. Ғимаратта санитарлық тораптар, ана мен бала бөлмелері, пандустар мен тактильді бағыттаушы элементтер де қарастырылған.
Осыдан кейін Белағаш теміржол вокзалының ашылу рәсіміне қатысқан қонақтар мұнда да жергілікті тұрғындар қуанышымен бөлісті.
– Жоба Мемлекет басшысы мен ел Үкіметінің көлік инфрақұрылымын жаңғырту жөніндегі тапсырмасы аясында жүзеге асып отыр. Көлік транзитінде маңызды орын алатын, 1926 жылдары салынған Белағаш вокзалын жаңғырту барысында да қазақстандық құрылыс материалдары пайдаланылды. Заманауи сәулеттік келбетке ие болған ғимараттың қасбеті мен шатыры жаңарып, әрлеу жұмысы жүргізілді. Инженерлік желілер толық жаңғыртылды. Ішкі үй-жайлар заманауи жанбайтын материалдарды пайдалана отырып орындалған, – деді өз сөзінде «ҚТЖ» ҰК» АҚ басқарушы директоры Марат Есқалиев.
Жалпы, қайта есік ашып отырған вокзалдар қазақстандық өндірістің желдету жүйелерімен, өрт дабылымен, ауа баптағыштармен және жаңа жиһаздармен жабдықталыпты. Жоба аясында жолаушылар платформалары да жаңартылып, вокзал аумақтары абаттандырылды.
Бүгінде Абай облысында тағы 8 вокзалда жаңғырту жұмыстары жалғасуда. Олар: Семей, Аягөз, Шар, Ақтоғай, Жалаңашкөл, Дегелең, Үшбиік және Жарма станцияларының вокзалдары. Жаңарып-жаңғырған барлық вокзалдар жолаушыларға сапалы қызмет көрсетіп, ел игілігіне айналатын күн алыс емес.