Ақтөбеде локомотив паркі жаңаруда

Ақтөбе локомотив пайдалану депосы – өңірдегі ең ірі өндірістік кәсіпорынның бірі. Мұнда 700-ге жуық адам еңбек етеді. Жаңа локомотивтер машинистер жұмысын жеңілдеткен. Нәтижесінде қозғалыс қауіпсіздігі ғана емес, өндірістік қуат та күшейді.

Транзиттік тасымалға тың серпін беріп отырған депо жұмысымен арнайы барып таныстық. Депо бастығының өндіріс жөніндегі орынбасары Бақытғали Джанесов теміржолдағы тасымал қарқыны, локомотивтер жұмысы жайлы айтып берді. Өзі де еңбек жолын машинист көмекшісі болып бастап, машинист, аға депо кезекшісі, нұсқаушы және инженер-технолог қызметтерінен өткен маманға барлық жұмыс етене таныс.  

Ақтөбе локомотив пайдалану депосы Ақтөбе – Илецк, Ақтөбе – Жем және Ақтөбе – Қандыағаш, Ақтөбе – Әйтеке би, Ақтөбе – Орал бағыттары бойынша тасымал қызметін ұйымдастырады. Және оған Шұбарқұдық – Сағыз, Шұбарқұдық – Қандыағаш арасында тасымал қызметін жүргізетін Шұбарқұдықта айналым депосы қарайды.  

Соңғы уақытта халықаралық транзиттік тасымалды дамыту бағытында маңызды өзгерістер жүзеге асырылуда. Одан әрине тоғыз жолдың торабындағы Ақтөбе де тыс қалмайды.  

«Екі мемлекет арасындағы келіссөздердің нәтижесінде Илецк станциясы арқылы жүк құрамдарын тоқтаусыз өткізу жобасы қолға алынды. Қазір эксперименттік сапарлар басталды. Пойыздар Ақтөбеден Шыңғырлауға дейін тоқтаусыз жүреді. Бұл уақытты үнемдеп, пойыздар санын көбейтуге мүмкіндік береді. Ең бастысы – Қытайдан Ресей мен Еуропаға бағытталған контейнерлік пойыздардың қозғалысын жеделдетуге ықпал етеді», – деді Бақытғали Джанесов.  

Бұл эксперимент Қытайдан Ресей мен Еуропаға бағытталған контейнерлік пойыздарға да оң әсерін тигізіп отыр. Локомотив бригадалары үшін Шыңғырлауда демалыс үйі жабдықталған.  

Ақтөбе локомотив пайдалану депосы тек тасымалмен ғана айналыспайды. Мұнда қалпына келтіру жұмыстары да жүргізіледі. Қазақстанның әр өңірінен жеткізілген зақымданған локомотивтер жөнделеді.

Қазір депо паркінде 92 локомотив бар. Локомотив паркі кезең-кезеңімен жаңарып жатыр. Қытайда шығарылған жаңа ТЭ36А тепловоздары жеткізілуде. Олар заманауи жабдықтармен қамтылған. Парк құрамында ТЭ33А(АС) локомотивтері де бар. Алдағы уақытта жаңғыртылған жаңа локомотивтер келуі күтілуде. Маневрлік жұмыстарда пайдаланылатын бірнеше ескі локомотивтер бар. Алдағы жылдары оларды толық жаңарту жоспарланып отыр.  

Соңғы жылдары депоның материалдық-техникалық базасы да айтарлықтай жаңартылды. Әкімшілік ғимарат күрделі жөндеуден өтіп, қызметкерлерге қолайлы жағдай жасалған. Терезелер ауыстырылып, инженерлік желілер жаңартылды. Демалыс бөлмелері мен конференц-зал және спортзал ашылды. Техникалық оқу кабинеті де жаңартылды. Мұнда оқу стендтері мен макеттер қойылған.  

Депо қызметкерлерінің басым бөлігін 35 жасқа дейінгі мамандар құрайды. Өткен жылы 15 жас маман жұмысқа қабылданса, биыл тағы төрт қызметкер қатарға қосылды. Белсенді жастар тұрақты түрде түрлі конкурстар мен жарыстарға қатысып, өздерін дамытудан кенде емес. «Таза Қазақстан» акциясына тұрақты қатысады. Қысқасы, байырғы депода өндіріс пен қоғамдық жұмыс қатар дамып келеді.