Тайынша теміржол вокзалында ғимаратты қайта жаңарту аяқталды
Солтүстік Қазақстан облысында 1958 жылы салынған Тайынша станциясының теміржол вокзалын қайта жаңарту аяқталды. Жаңғырту нәтижесінде ғимараттың ауданы 374,6-дан 579,72 шаршы метрге дейін ұлғайтылды деп хабарлайды Rail-news.kz.
Жұмыс барысында вокзал ғимараты толығымен жаңартылды: шатыр, сумен жабдықтаудың инженерлік желісі, кәріз, жылумен жабдықтау, электрмен жабдықтау және әлсіз ток жүйелері ауыстырылды, ішкі және сыртқы әрлеу орындалды, іргелес аумақ пен перрон абаттандырылды. Жаңа кіреберіс тобы салынып, заманауи жиһаздар мен қажетті жабдықтар орнатылды.
Қайта құру кезінде заманауи берік және отқа төзімді материалдар пайдаланылды. Қасбеті металл сызықтық панельдермен қапталған, ішкі бөлмелері жаңартылып, заманауи төбелік жүйелер мен еден жабындары орнатылған.
Жолаушылар үшін қолайлы және қауіпсіз орта құруға ерекше назар аударылды. Ғимаратта қосымша эвакуациялық шығулар, мобильділігі төмен азаматтарға арналған пандус және тактильді плиткалар жабдықталған.
Тайынша II класты теміржол вокзалы. Станция арқылы аймақты Астана, Алматы, Петропавл, Қарағанды, Қызылорда, сондай-ақ Қырғызстан және Ресеймен байланыстыратын 12 жолаушылар пойызы жүреді.