Болашақтың игі бастамасы
Маңғыстау облысы бойынша меншікті тілші
Еліміздің Түрікменстанмен шектесетін теміржол бойында орналасқан Болашақ станциясының тұрғындары игі бастаманы қолға алды. Тұрғындарының басым бөлігі теміржолшылардан тұратын Болашақ ауылы алкогольді ішімдіктен бас тартты.
Маңғыстаудың шалғайдағы ауылының әкімі ұсынған бастаманы ақсақалдар алқасы мақұлдап, кәсіпкерлік нысандар да қос қолдап келісті. Болашақтықтардың болашағы үшін жасаған бұл қадам кәсіпкерлік нысандармен жасалған арақ-шарап сатпау туралы меморандум арқылы бекітіліп, рәсімделді.
– Ауылда төрт дүкен мен асхана және наубайхана бар. Асхана мен наубайханада бұрыннан да ішімдік сатылмайды. Десе де барлығы меморандумға қол қойды. Меморандумды аудан әкімі Сымбат Төретаевтің өзі келіп, кездесу ұйымдастырып, аудан прокуроры, ішкі істер мен кәсіпкерлік бөлімдері, ауылдағы кәсіпкерлеріміз бәрі бірлесе жасады. Біз де мұндай шешімді қуана құптаймыз. Ащы су шөлмекке сыйғанымен адамның ішіне сыймай, түрлі жамандықтың бастауы болып жатады. Ішімдік ішетін жанұяларда өсіп келе жатқан ұрпақтың болашағын ойлаған жөн. Өзге ауылдарды да осындай игі қадам жасап, ізгілікті істі жалғастыруға шақырамыз, – дейді Болашақ ауылы қоғамдық қауымдастығының төрағасы, теміржолшы Ерболат Бытықов.