Шарда теміржол вокзалы қайта жаңғыртылып жатыр
Абай облысының әкімі Берік Уәли Жарма ауданына қарасты Шар қаласына барып, әлеуметтік және инфрақұрылымдық маңызы бар бірқатар нысандардағы құрылыс жұмысының барысымен танысты, деп хабарлайды Rail-news.kz.
Аймақ басшысы Шар қаласындағы теміржол вокзалын қайта жаңғырту жұмысының барысын да көрді.
Шағын шаһардағы теміржол вокзалы 1982 жылы салынған. Ғимаратқа соңғы рет 2012 жылы күрделі жөндеу жүргізілген. Мұнда бір күнде 160 адамға дейін қызмет көрсетіледі.
Теміржол вокзалын қайта жаңғырту жұмыстары былтыр басталған. Мердігерлердің айтуынша, екі қабаттан тұратын жаңартылған ғимарат тамыз айында пайдалануға беріледі.
Реконструкция барысында ғимарат аумағы 413 шаршы метрден 654 шаршы метрге дейін ұлғайтылады. Шатыр толық ауыстырылып, ішкі және сыртқы әрлеу жұмысы жүргізіледі. Су, кәріз, жылу, электрмен жабдықтау, желдету және кондиционерлеу жүйесі жаңартылады. Перрондар қайта жөнделіп, іргелес аумақтар абаттандырылады. Вокзалдар жаңа жиһаздармен және қажетті жабдықтармен қамтамасыз етілетін болады.
Облыс әкімі вокзал ғимаратын жаңғырту жұмыстары тұрғындар мен жолаушыларға қолайлы жағдай жасауға бағытталғанын атап өтті.
«Мемлекет басшысы Қасым-Жомарт Тоқаевтың тапсырмасына сәйкес «Қазақстан темір жолы» ұлттық компаниясының вокзал инфрақұрылымын жаңғырту бағдарламасы аясында республика бойынша 124 вокзалды жаңғырту жұмысы басталған болатын. Жуықта Бородулиха ауданының Ауыл және Белағаш ауылдарындағы теміржол вокзалдары қайта жаңғыртудан кейін елімізде алғаш болып пайдалануға берілді. Қазіргі уақытта өңірдегі 8 теміржол вокзалын (Семей, Аягөз, Шар, Ақтоғай, Жалаңашкөл, Дегелең, Үшбиік және Жарма станциялары) жаңғырту жұмыстары жалғасуда. Ең бастысы, нысандарды белгіленген мерзімде пайдалануға беруіміз керек», – деді Берік Уәли.