Әйтеке би станциясында астық тасымалы артқан
Ақтөбе облысы бойынша меншікті тілші
Әйтеке би – «Хромтау-Алтынсарин» теміржол желісі бойындағы жеті станцияның бірі. Теміржолшылардың үйлесімді еңбегінің арқасында станция өңірдегі жүк тасымалының маңызды торабы болып отыр.
Биылғы жеті айда Әйтеке би станциясынан 340 вагон астық экспортқа жөнелтілді. Сонымен қатар Өзбекстан темір жолына 66 вагон ақ каолин сазы тиеліп, станцияның жүк айналымын едәуір арттырған.
– Станцияда бес жол бар. Оның алғашқы екеуі жолаушылар пойыздарын қабылдауға арналса, қалған үш жол жүк тасымалына қызмет көрсетеді.
Биыл жүк тиеу көрсеткіші айтарлықтай артты. Астықты өңір саналатын ауданда дәнді дақылдарды тиеу жұмыстары жыл бойы үздіксіз жүргізіледі. Жеті ай ішінде Солтүстік Кавказ, Қаршы, Самарқанд және Килиязи бағыттарына 340 вагон астық жөнелтілді. Біздің басты міндетіміз – қозғалысты үйлестіру. Келген вагондарды уақытылы қабылдап, жөнелту жұмыстарын тиянақты атқарып, транзиттік пойыздардың кідіріссіз жүруіне қолайлы жағдай жасап отырған тміржолшылардың еңбегінің арқасында станцияның жүк түсіру көрсеткіші де жоғары деңгейде. Жеті айда 208 вагон жүк қабылданды. Оның ішінде көмір, ұлутас, цемент, жол торлары және темірбетон шпалдары бар. Бұл құрылыс және инфрақұрылымдық жұмыстарға қажетті материалдарға сұраныстың артқанын көрсетеді, – дейді станция бастығы Жандос Әбдіжәлелов.