Орал – Жилаево аралығында теміржолдағы қауіпсіздік бойынша профилактикалық рейд өтті
Орал – Жилаево аралығында теміржол көлігі объектілерінде жарақаттанудың алдын алу бойынша бірлескен профилактикалық рейд өтті. Іс-шара «Заң және тәртіп» тұжырымдамасын іске асыру үшін бүкіл ел бойынша ҚТЖ өткізіп келе жатқан «Қауіпсіз темір жол» акциясы аясында жүзеге асырылды, деп хабарлайды Rail-news.kz.
Рейдке теміржолшылар, Орал станциясының көліктегі полиция бөлімінің, Батыс Қазақстан облысы бойынша ведомстволық теміржол күзеті мен Көліктік бақылау инспекциясының қызметкерлері қатысты.
Профилактикалық іс-шаралар Орал қаласының Кар-Сити ауданында және Жилаево станциясында өтті. Дәл осы жерде тұрғындар көбінесе темір жолдарын белгіленбеген жерлерде кесіп өтіп, өз өмірі мен пойыз қозғалысының қауіпсіздігіне қауіп төндіреді.
Рейдке қатысушылар темір жолдың жанында орналасқан аудан тұрғындарымен түсіндіру жұмыстарын жүргізді. Тұрғындарға темір жолы арқылы қауіпсіз өту ережелері қаперге салынып, жадынамалар табысталды және әкімшілік жауапкершілік туралы ескертілді. Жасөспірімдер өтіп бара жатқан пойыздарға тас лақтыратын жағдайлардың алдын алуға ерекше назар аударылды.
Теміржолшылар белгіленбеген жерлерде темір жолы арқылы өтуге әкімшілік жауапкершілік қарастырылғанын еске салады.
ҚТЖ азаматтарды қауіпсіздік ережелерін сақтауға және темір жолдарды тек арнайы жабдықталған орындардан өтуге шақырады.
