Табиғат аясындағы семинар-тренинг
"Қазақстан теміржолшысы" газетінің Жамбыл облысындағы меншікті тілшісі
Теміржолшылардың кәсіби мерекесі қарсаңында Түркістан облысы Түлкібас ауданындағы Машат шатқалындағы «Алтын балық» демалыс аумағында «ҚТЖ – Жүк тасымалы» ЖШС «Жамбыл» филиалының кәсіподақ ұйымының ұйымдастыруымен семинар-тренинг өтті.
Теміржолшы қыз-келіншектерге арналған семинарда тренингтік әрі сауықтыру іс-шаралары қатар қамтылуымен ерекшеленгенін айту керек. «Қазтеміржолкәсіп» ҚБ Жамбыл филиалының жұмыс жоспарына сәйкес өткен оқу курсының тиімді форматы қатысушылардың есінде қалды.
– Жыл сайын «Қазтеміржолкәсіп» ҚБ Жамбыл филиалы 25 қараша – Халықаралық Әйелдерге қатысты зорлық-зомбылықты жою күніне орай ауқымды іс-шаралар ұйымдастырады. Биылғы жұмыс жоспарына да теміржолшы қыз-келіншектерге арналған семинар-тренинг өткізуді енгізгенбіз. Әйел құқығын, әйелдер еңбегін қорғау мәселесі бір ғана атаулы күнмен шектелмейді. Негізгі аудитория – сала мамандары. Жүйені дамытуда үлкен жауапкершілікті ер азаматтармен бірдей көтеріп жүрген қыз-келіншектерге оқу курсы шеңберінде табиғат аясында сауықтыру іс-шаралары қамтылған бір күндік демалыс сыйлауды жөн көрдік. Сондықтан, «ҚТЖ – Жүк тасымалы» ЖШС «Жамбыл» филиалы басшылығының ұсынысымен екі атаулы күнді қатар қамтыдық, - дейді филиалдың кәсіподақ ұйымының төрағасы Серік Наурызбаев.
Таңғы алтыда жолға шыққан газель көлігі демалыс аймағына ерте жетті. Семинар-тренингтің бағдарламасы бойынша оқу курсының алғашқы бөлімінде спикерлердің баяндамасы тыңдалып, қатысушылар тақырып аясында ой-пікірлерімен бөлісті.
Жиынды ашып берген «ҚТЖ – Жүк тасымалы» ЖШС «Жамбыл» филиалы кадр бөлімінің бастығы Меруерт Баймұрзаева Халықаралық Әйелдерге қатысты зорлық-зомбылықты жою күнінің шығу тарихына тоқталып, жыл өткен сайын атаулы дата аясындағы ұйымдастырылатын іс-шаралардың ауқымы кеңейіп келе жатқанын атап өтті. Өз баяндамасында әйелдер құқығын қорғаудың бір бағыты – еңбекші топтың лайықты сауықтырумен қамтылуы екенін қозғады.
– Бүгінгі семинар-тренингке филиалға қарасты Тараз және Шу локомотив пайдалану деполары, станциялардағы жүк тасымалына жауапты мамандар, жалпы отызға жуық адам шақырылды. Түске дейінгі жоспарланған іс-шаралар бойынша тақырыптық баяндамалармен қатар, қажетті білімді, тәжірибені, қарым-қатынас дағдыларын және әлеуметтік бейімделуді дамытуға бағытталған белсенді оқыту әдісі – тренингтер өткізілді, - деп атап өтті Меруерт Баймұрзаева.
Семинардың модераторы, ТЧЭ – 31 Тараз локомотив пайдалану депосының Қоршаған ортаны қорғау жөніндегі жетекші инженері Гүлжана Хусайынова баяндама жасап, соңғы жылдарда елімізде әйелдерді зорлық-зомбылықтан қорғауға бағытталған заңнамалар күшейтілгенін атап өтті. Тұрмыстық зорлық-зомбылық үшін қылмыстық жауапкершілік қарастырылғанын сөз етті.
Жиында ТЧЭ – 30 Шу локомотив пайдалану депосының 1 санатты инженер-технологі, бастауыш кәсіподақ ұйымының төрағасы Қуат Молдабаев тақырып аясында әңгіме қозғап, пікірімен бөлісті. Сондай-ақ семинардың екінші бөлімінде филиалдың Еңбек қауіпсіздігі және еңбекті қорғау, экология жөніндегі жетекші инженері Бексұлтан Келіс қатысушылар арасында тренингтік жарыстар өткізді.
Үш топқа бөлінген теміржолшы қыз-келіншектер кәсіптеріне қатысты қойылған сұрақтарға жауап берді. Ребустар мен сканвордттарды шешіп, білім-біліктілерімен қатар, таным аясының кеңдігін көрсетті. Жалпы ұпай санына қарай, жеңімпаздар анықталып, арнайы Диплом және Кубоктармен марапатталды. Белсенді қатысушылар мен бастауыш кәсіподақ ұйымдарының жетекшілері де сый-сияпатсыз қалған жоқ.
Бұдан соң қатысушылар Машат шатқалындағы тарихи-мәдени нысан – Тамшы әулие бұлағына барды. Теміржолшы қыз-келіншектер таза ауа, тамылжыған табиғат аясындағы семинар-тренингтің берері көп болғанын айтып, ұйымдастырушыларға ризашылықтарын жеткізді.