Жамбыл магистральдық желі бөлімшесінде екі автотрансформатор пункті салынды

Жамбыл магистральдық желі бөлімшесіне қарасты «Қорағаты – Аспара», «Тәтті – Қорағаты» өткелдерінде екі автотрансформаторлық электр қуатын беру пунктінің құрылысы аяқталды.

Бұл қадам аталған учаскедегі инфрақұрылымдық шектеулерді жоюдың кезекті кезеңі болды. Енді жаңа автотрансформаторлық қуат беру пункттері магистральдық желіні электрмен тұрақты қамтамасыз етеді. Сондай-ақ теміржол инфрақұрылымының сапасын жақсартуға едәуір серпін береді. Пойыздардың қауіпсіз және үздіксіз жүруіне жағдай жасайды.  

Жалпы соңғы жылдарда тасымал көлемінің ұлғаюына және учаскелер арқылы өтетін ауыр жүк пойыздары санының артуына байланысты жоғарыдағы өткелдерде жаңа автотрансформаторлық пункт салуға деген сұраныс айқындала түскен болатын. Себебі мұндағы жолдың күрделі бойлық бейіні жақсы жабдықталған қуатты электр тартқыш жүйесімен қамтамасыз етуді қажет ететін. Ал автотрансформаторлық электр қуатын беру пункттері темір жолдарды электрмен жабдықтаудың қазіргі заманғы жүйесінің негізгі элементтерінің бірі екені анық. Олар байланыс желісіндегі кернеудің қажетті деңгейін ұстап тұрады, электр қуатының жоғалуын азайтады. Ең бастысы пойыздардың қарқынды қозғалысы кезінде электр құрылғыларының тұрақты жұмысын қамтамасыз етеді.  

Теміржол инфрақұрылымын жақсартуда магистральдық желілерді қуатты электр тартқыш жүйесімен жабдықтаудың маңызы зор. Бұл учаскені пайдаланудың тиімділігі өз алдына, бірінші кезекте сенімділікті арттырады. Пойыздарды өткізу қабілетінің жобалық параметрлерге сәйкестігін қамтамасыз етеді. Жүк және жолаушылар тасымалының одан әрі өсуі үшін қосымша резерв құруға мүмкіндік береді.