Шығыс Қазақстан облысында екі теміржол вокзалын қайта жаңарту аяқталды
Шығыс Қазақстан облысында екі теміржол вокзалын – Алтай мен Күмістауды қайта жаңарту аяқталды, деп хабарлайды Rail-news.kz.
Жобаны іске асыру барысында екі нысанда да құрылыс-монтаждау жұмыстарының толық кешені орындалды. Ғимараттардың, шатырдың қаңқасын орнату бойынша жұмыстар аяқталып, үй-жайлардың сыртқы және ішкі әрлеуі орындалды, кәріз, сумен, электрмен жабдықтаудың ішкі инженерлік желілері және төмен токтық жүйелер орнатылды. Жолаушылар платформаларын жайластыру бойынша жұмыстар жүргізілді. Вокзалдар жаңа жиһазбен және заманауи жабдықтармен жабдықталған.
1953 жылы салынған Алтай теміржол вокзалы қайта құрудан кейін жолаушылар инфрақұрылымына қойылатын заманауи талаптарға сай келеді. Станция арқылы Өскемен қаласына көлік қатынасын қамтамасыз ететін екі жолаушылар пойызы жүреді.
1954 жылы салынған Күмістау станциясы да толығымен жаңартылды. Станция арқылы Өскемен қаласына көлік қатынасын қамтамасыз ететін екі жолаушылар пойызы жүреді.
Вокзалдарды қайта жаңарту жолаушыларға қызмет көрсету сапасын арттыруға, жайлы және қауіпсіз орта құруға, сондай-ақ өңірдің қазіргі заманғы теміржол инфрақұрылымын одан әрі дамытуға бағытталған.
