Ақмола облысында 5 теміржол вокзалын қайта жаңарту аяқталды

Ақмола облысында бес: Державинская, Үленті, Ерейментау, Еркіншілік және Жалтыр теміржол вокзалын қайта жаңарту аяқталды, деп хабарлайды Rail-news.kz.

 Жобаны іске асыру шеңберінде Державинская және Жалтыр вокзалдарында қолданыстағы ғимаратты қайта жаңарту жүргізілді. Үленті, Ерейментау және Еркіншілік вокзалдарында ескі ғимараттарды толық бөлшектеу, одан кейін жаңа заманауи жолаушылар кешендерін салу орындалды. Жалтыр вокзалында инженерлік инфрақұрылымды жаңғырта отырып, қолданыстағы ғимаратты кешенді қайта жаңарту жүргізілді.

Барлық нысандарда кәріз, сумен, жылумен және электрмен жабдықтау жүйелері жаңартылып, ішкі әрлеу жұмыстары орындалды, іргелес аумақтар абаттандырылып, жаңа жиһаз бен заманауи технологиялық жабдықтар орнатылды. Құрылыс кезінде отандық өндірістің берік және отқа төзімді материалдары пайдаланылды. Өрт қауіпсіздігі талаптарына сәйкес қосымша эвакуациялық шығу жолдары көзделген. Теміржол инфрақұрылымының қолжетімділігін қамтамасыз ету үшін Үленті, Ерейментау, Еркіншілік және Жалтыр вокзалдарында мобильділігі төмен жолаушыларға арналған пандустар жабдықталған.

1960 жылы салынған Державинская теміржол вокзалы жөндеуден кейін ауданы 225,33 шаршы метр болатын заманауи бір қабатты ғимарат кейпінде көрініс тапты. Станция арқылы Астана, Қостанай және Арқалықпен байланысты қамтамасыз ететін алты жолаушылар пойызы өтеді.

1952 жылы пайдалануға берілген Үленті вокзалы 211-ден 225,33 шаршы метрге дейін қайта құрылды. Станция арқылы елді мекенді Астана, Қарағанды, Көкшетау, Павлодар, Семей, Түркістан және Маңғыстаумен байланыстыратын сегіз жолаушылар пойызы өтеді.

Ерейментау станциясында 1953 жылы салынған вокзал ғимараты жаңартылды. Қайта құрудан кейін оның ауданы 380-нен 430,57 шаршы метрге дейін өсті. Станция арқылы Астана, Қарағанды, Көкшетау, Павлодар, Семей, Өскемен, Жезқазған, Қызылорда, Түркістан және Маңғыстаумен байланыс орнататын 18 жолаушылар пойызы өтеді.

1960 жылы салынған Еркіншілік станциясы да толығымен жаңартылды. Ғимараттың ауданы 195,8-ден 225,33 шаршы метрге дейін өсті. Станция арқылы оны Астана, Қарағанды, Көкшетау, Павлодар, Семей, Түркістан және Шымкент қалаларымен байланыстыратын он жолаушылар пойызы өтеді.

Жалтыр вокзалында ғимараттың ауданы 370-тен 442,8 шаршы метрге дейін ұлғайтылды. 1958 жылы салынған бір қабатты вокзал заманауи құрылыс шешімдері мен отандық өндіріс материалдарын қолдана отырып толығымен жаңартылды. Қайта құрудан кейін 2 типті вокзал қауіпсіздіктің, жайлылықтың және қол жетімділіктің заманауи талаптарына толық сәйкес келеді. Станция арқылы күн сайын Астана, Арқалық және Атбасармен қатынасуды қамтамасыз ететін алты жолаушылар пойызы өтеді. 

Вокзалдарды қайта жаңарту жолаушыларға қызмет көрсету сапасын арттыруға, жайлы және қауіпсіз орта құруға, сондай-ақ азаматтардың барлық санаттары үшін теміржол инфрақұрылымының қолжетімділігін қамтамасыз етуге бағытталған. Жаңартылған вокзалдар көлік инфрақұрылымының заманауи талаптарына сәйкес келеді және елдің теміржол желісін одан әрі дамытуға ықпал ететін болады.