Сарышағанда «Теміржол саябағы» ашылды
"Қазақстан теміржолшысы" газетінің Жамбыл облысындағы меншікті тілшісі
Биыл Сарышаған станциясы кәсіби мерекені ерекше форматта атап өтті. Теміржолшылар күні қарсаңында вокзал маңында «Теміржол саябағы» ашылып, еліміздегі алғашқы электровоз ескерткіші орнатылды.
Шу – Мойынты телімінің құрылысы іске қосылғаннан кейін іргесі қаланған Сарышаған станциясы – Балқаш көлінің жағасында, Бетпақдала даласында орналасқан, Арқа мен Жетісуды байланыстырып жатқан теміржолшылар мекені.
Мерекеге орай өткізілген салтанатты іс-шараға «ҚТЖ-Жүк тасымалы» ЖШС локомотив шаруашылығы департаментінің директоры Константин Цой, «Жамбыл магистральдық желі бөлімшесі» филиалының директоры Асқар Жексенбаев, «Қазтеміржолкәсіп» ҚБ Жамбыл филиалының төрағасы Ерболат Жидебаев, Қарағанды облысы, Ақтоғай ауданының әкімі Абылай Аманжолов және Алматы, Қарағанды облыстарынан арнайы келген сала ардагерлері қатысты.
Жиында теміржолшыларды кәсіби мерекесімен, Ақтоғай ауданының жұртшылығын жаңа саябақтың ашылуымен құттықтаған Константин Сергеевич бұл жаңалық Сарышаған кенті үшін маңызды оқиға екенін атап өтті.
Ал Асқар Төреханұлы Сарышаған учаскесінің, филиалдың құрылымдық бөлімшелер қызметкерлерінің аймақ теміржолын дамытуға үлкен үлес қосып отырғанына тоқталып, жергілікті теміржолшылар мен аудан жұртшылығына ізгі тілегін жеткізді.
Мерекелік салтанатты жиында теміржол саласының қызметкерлері мен саябақ құрылысына атсалысқан азаматтарға Құрмет грамоталары мен Алғыс хаттар тапсырылып, сый-құрмет көрсетілді.
Сарышаған кентінен «Теміржол саябағын» ашу туралы идеяны көтеріп, игі іске бастамашы болған – салада 50 жыл еңбек еткен Құрметті теміржолшы, «Даңқ» орденінің иегері, есімі «Алтын кітапқа» енген Кендай Ахметов екенін атап өту керек.
– Бұл игі іс – өткенге тағзым, еңбек адамдарына құрмет, келешек ұрпаққа аманат. Теміржолшылардың ерен еңбектерінің тарихқа айналған сәті. Себебі бүгін тек электровоз монументі ғана қойылған жоқ, вокзал маңындағы жаңа саябақ ашылды. Онда осы Сарышаған кентінде шойын жолда шыңдалып, саланың дамуына үлес қосқан сала ардагерлерінің есімдері жазылған ескерткіш тақталар қойылды, – дейді Кендай Төлеуханұлы.
Теміржолшылар саябағының аумағы кең. Кіреберісіне Сарышағандағы Жамбыл филиалына қарасты құрылымдық бөлімшелердің тарихы жазылған ақпараттық тақталар орнатылған. Ал электровоз монументінің алдында және жанында ескерткіш тақталар қойылған. Онда «Мойынты – Сарышаған» желісінің кернеуін іске қосқан кезекші механик Күлән Ахметова, екіншісінде осыдан 41 жыл бұрын Сарышаған станциясына алғашқы электровозды жеткізген машинистер Игенбек Асылбеков, Аманбай Қайырбаев, көмекші машинист Ибрагим Дүйсембаевтар есімі жазылған. Тағы бір тақта саланы дамытуға өлшеусіз үлес қосқан Құрметті теміржолшыларға арналған.
Қос мерекеге орай темір жолдың құрылымдық бөлімшелері Сарышаған станциясы алдында ақшаңқан киіз үйлер тігіп, қонақтарға арнап ақ дастархан жайды. Бұл күні Сарышаған темір жолының бойын қуанышты көңіл күй, әуелеген сазды ән тербеп тұрды.