Маңғыстауда үздік теміржолшылар төсбелгілермен марапатталды

Маңғыстау теміржолында Көлік қызметкерлері күніне арналған «Өмір жолым – темір жол!» атты мерекелік жиын өтті. Жүк тасымалы және магистральдық желі бөлімшелерінің әкімшілігі ғимаратында ұйымдастырылған салтанатты шара барысында өңір теміржолшыларының мерейі артып, түрлі марапатқа ие болды.

Маңғыстау магистральдық желі бөлімшесінің директоры Қарақат Жақанов бастап, Маңғыстау жүк тасымалы бөлімшесінің директоры Ерназар Ізтұрғанов, Бас ревизор Болат Дүйсалиев, Орталық кәсіподақтың өңірдегі өкілі Сәрсенбай Есенқұлов теміржолшыларды төл мерекемен құттықтады. Сала дамуы жолында аянбай тер төгіп жүрген жандарға мерекелік марапаттар табыс етілді.  

ЖТ бөлімшесі бойынша Маңғыстау локомотив депосының цех комитеті төрағасы Әбілсейіт Набиханов, Жаңаөзен айналым депосының техникалық қауіпсіздік инженері Бауыржан Қойлыбаев «Адал еңбегі үшін» төсбелгісін алды. ЖТ бөлімшесі өндірістік бөлім басшысы Салима Мамаева «Кәсібі бойынша үздік», Бейнеу ст. вагон қараушы-жөндеушісі Бақытжан Сүгірбай «Үздік вагоншы», Маңғыстау локомотив пайдалану депосының машинисі Сисен Абилжанов «Үздік машинист», Маңғыстау локомотив пайдалану депосының машинисі Қайсар Азаматов «Үздік теміржолшы» атанды.  

Магистральдық желі бөлімшесінің құрамына кіретін мекемелердің қызметкерлері де марапаттан кенде болмады. «Құрметті теміржолшылар» қатары екі адамға толықты. Электрмен жабдықтау дистанциясының электрмонтері Агыс Нурмамедов пен НЖС-14 Жол бөлімінің басшысы Нұрлыбай Қисаев «Құрметті теміржолшы» төсбелгісін тақты. Нұрлыбай Қисаев марапатын Астана қаласынан алып қайтты. Белгі беру және байланыс дистанциясының телім басшысы Ақтау Бабақұлов пен Қозғалыс шаруашылығы зейнеткері Сансызбай Есенгелді «ІІІ дәрежелі Теміржол даңқы» медалін алды.  

Белгі беру және байланыс дистанциясы бастығының орынбасары Сағадат Кульшиковқа «Адал еңбегі үшін», аға электрмеханик Берік Селбаевқа «Кәсібі бойынша үздік», Боранкұл ст. кезекшісі Рүстем Лұкманов пен Маңғыстау ст. пойыз құрастырушысы Нұрсұлтан Кенжетаевқа «Қозғалыс қауіпсіздігі үшін», Сайөтес электрмен жабдықтау ауданының бастығы Ғинаят Арықбаевқа «Үздік энергетик», Бейнеу ст. ТҚКП вагон қараушысы Бақытжан Сүгірбайға «Үздік вагоншы», НЖС-14 Материалдық қамту бөлімі басшысының орынбасары Сағынбек Арзыбекке «Үздік жас маман» төсбелгілері табысталды.