«Ахау Семей» шырқалған күн...
Абай облысы бойынша меншікті тілші
Семейлік теміржолшылар үшін биылғы теміржолшылар күні мерекелік көңіл күйге толы болды.
Семей ЖТ филиалының басшысы Алмас Сейсемқанов пен Семей магистральдық желі бөлімшесінің басшысы Айдын Шәукежанов және «Қазтеміржолкәсіп» ҚБ Семей өңірі бойынша өкілі Есен Қажығұловтар сөз алып, барша жиналған көпшілік алдында құттықтау лебіз білдірді.
Әрине, мерекелік жиын барысында төл мерекеге орай еңбекте жетістікке жеткен көптеген теміржолшылар марапатталды. Әсіресе ерен еңбегі еленіп, «Құрметті теміржолшы» атанған Аягөз белгі беру және байланыс дистанциясының электрмеханигі әрі осы өңірдегі Жүзағаш станциясының бастығы қызметін қоса атқаратын Мұрат Хаджиакпаровтың есімін ерекше атай кету ләзім.
Сондай-ақ тағы бірқатар абырой иелері «Қазтеміржолкәсіп» ҚБ марапатына ие болды. Олардың қатарында қоғамдық іс-шараларда белсенділігімен көзге түсіп жүрген Семей станциясының бас инженері Бекзат Кәрімханов «Қызметке адалдығы үшін» атты төсбелгісін салтанатты түрде өңіріне тақты. Саланың дамуына зор үлес қосып келе жатқан желі бойындағы қызметкерлер де марапаттан тыс қалмады. Көптеген теміржолшылар Абай облысы әкімінің алғыс хатын иеленді.
Мерекелік бағдарлама барысындағы ән мен жыр салтанатты жиынның ажарын айшықтай түсті. Әсіресе тарихи қаланың гимніне айналған «Ахау Семей» әнін әуелете шырқаған әнші көпшіліктің ризашылығына бөленді.