Құрмет төрінде – теміржолшылар

Қызылорда облыстық драма театрында облыс әкімі Мұрат Ергешбаев қатысқан салтанатты шара көлік қызметкерлері күніне арналды. Сала ардагерлері мен аймақ теміржолшыларын кәсіби мерекемен құттықтаған әкім отызға жуық сала маманын марапаттап, олардың ерен еңбегіне құрмет көрсетті.

Салтанат барысында аймақ теміржолын дамытуға үлес қосып жүргендер қатарында Қызылорда жол дистанциясының бастығы Ербол Оңғарбаев, Жосалы станциясының бастығы Бауыржан Баянов, ревизор Алмат Молдашев, электромеханик Әкімбек Керімханов, кәсіподақ ұйымының төрайымы Ғалия Ноғайбаева, инженер Ахметқали Елеусінов және бірқатар теміржолшы облыс әкімінің Алғыс хатымен, «Қызылорда облысының дамуына қосқан үлесі үшін» төсбелгісімен, Көлік министрлігінің «Құрметті теміржолшы» атағымен, салалық «Адал еңбегі үшін», «Кәсібі бойынша үздік», «Үздік жас маман», «Үздік жол шебері», «Үздік байланысшы» төсбелгілерімен, Құрмет грамотасымен және «III дәрежелі Теміржол даңқы» медалімен марапатталды.  

Мемлекет басшысының көлік-логистика инфрақұрылымын дамыту жөніндегі тапсырмаларына тоқталған облыс әкімі теміржол саласының ел экономикасындағы стратегия лық маңызын ерекше атап өтті.  

Сахна төрінен аймақ теміржолшыларын кәсіби мерекемен құттықтаған Қызылорда магистральдық желі бөлімшесінің директоры Батырхан Базарбаев теміржолдың ел экономикасының тұрақты дамуына серпін беретін, өңірлер мен халықты байланыстыратын стратегиялық маңызы зор сала екенін тілге тиек етті. Осы жауапты қызметтің үздіксіз әрі қауіпсіз орындалуына күн сайын адал еңбек етіп жүрген әріптестеріне алғысын білдіріп, сала үздіктерін марапаттады.  

Жиында өңірдің теміржол саласында 7 мыңнан астам адам еңбек ететіні, осынау теміржолшылардың еселі еңбегі арқасында облыс арқылы өтетін жүк пен жолаушылар легі кесте бойынша кідіріссіз жүргізіліп жатқаны, Сыр өңірінің транзиттік әлеуеті жыл сайын артып келе жатқаны айтылды. Салтанатты шараны облыс өнерпаздары ән-жырмен өрнектеп, мерекелік көңіл күй сыйлады.