Боранды бекеттің бас қақпасы

Жамбыл облысы Жуалы ауданындағы әйгілі шығармаға арқау болған Боранды бекеттегі теміржол вокзалын қайта жаңғырту жұмыстары аяқталып, пайдалануға берілді.

Теміржолшылардың төл мерекесі қарсаңында өткен вокзалдың ашылу салтанатында Жамбыл магистральдық желі бөлімшесінің директоры Асқар Жексенбиев жоба Мемлекет басшысының тапсырмасына сәйкес еліміздегі 124 теміржол вокзалын жаңғырту бағдарламасы аясында жүзеге асырылғанын айтып өтті. Жобаны іске асыру шеңберінде Боранды вокзалында шатырды монтаждау, ғимараттың сырты мен ішін әрлеу, кәрізбен, сумен, жылумен және электрмен жабдықтаудың сыртқы және ішкі инженерлік желілерін жаңғырту жұмыстары жүргізілді. Сонымен қатар жолаушылар платформасы реконструкцияланды. Ғимарат толықтай жаңа жиһаз және заманауи жабдықтармен қамтамасыз етілді. Жаңарту кезінде қазақстандық өндірістің берік материалдары пайдаланылды.  

Көпшілік көріп, куә болғанындай, күту залдары мен қызмет көрсету аймақтары заманауи талапқа сай жабдықталған. Тіпті мүмкіндігі шектеулі азаматтар мен емізулі баласы бар аналарға да арнайы бөлме қарастырылыпты.  

– Қыс айларындағы боранды күндерде халықаралық дәліз жабылып қалғанда құтқарушылар бригадасы жолда қалған жолаушыларды Боранды вокзалына тасып, пойызға отырғызып жібереді. Сол кезде ескі ғимарат тарлық ететін. Енді міне нысан аумағы кеңейіп, қайта жаңғыртылып, талапқа сай жабдықталып, жолаушыларға қолайлы жағдай жасалып отыр, – дейді Жуалы ауданының әкімі Жалғас Мұртаза.

1905 жылы салынған Боранды теміржол вокзалы қайта жаңғыртылғаннан кейінгі жалпы ауданы 309,65 шаршы метрді құрайды. Станция арқылы Алматы, Астана, Қарағанды, Көкшетау, Бурабай курорты, Павлодар, Семей, Петропавл, Ақтөбе, Маңғыстау, Түркістан, Шымкент және Қызылорда қалаларымен, сондай-ақ Ресей Федерациясына 20 жолаушылар пойызы қатынайды. Енді мұнда тәулігіне 50-ден астам жолаушыға қызмет көрсетуге мүмкіндік туды.  

Вокзалды жаңарту жолаушыларға қызмет көрсету сапасын арттыруға, жайлы және қауіпсіз орта құруға, сондай-ақ теміржол инфрақұрылымының қолжетімділігін қамтамасыз етуге бағытталған. Жаңартылған вокзал көлік инфрақұрылымына қойылатын заманауи талаптарға сәйкес келеді және Жамбыл облысының тұрғындары мен қонақтары үшін жайлылықтың жоғары деңгейін қамтамасыз етеді.