Қауіпсіздік – баршаға ортақ талап
Абай облысы бойынша меншікті тілші
Семейлік теміржолшылар республикалық «Заң мен тәртіп» тұжырымдамасы аясында жол өткелдерінде қауіпсіздік профилактикасы бойынша өтіп жатқан акцияға үн қосуда.
Жоспарлы жұмыстар аясында кезекті акцияны Дегелең – Жаңа-Семей теліміндегі 656-шақырымдағы жол өткелі бойында Семей жол дистанциясының ұжымы ұйымдастырып өткізді. Жалпы, Құрметті теміржолшы Рахат Ботаспаев басқаратын ПЧ-39 мекемесі желі бойындағы қауіпсіздік шараларына жиі ұйытқы болуда. Десек те, бұл жолғы акцияның ауқымы кең болды. Бас инженері Мырзабек Керейбаев бастаған жолшылар жол өткелі бойында арнайы ақпараттық парақшалар үлестіріп, жүргізушілер қауымы үшін түсіндіру жұмыстарын жүргізді.
Мақсат – теміржол өткелінің қауіпті аймаққа жататынын және көлік жүргізушілері мен жаяу жүргіншілердің желі бойындағы міндеттерін жеткізу болатын.
– Теміржол бойындағы жүріс-тұрыс қағидаларын сақтау қауіпсіздік кепілі екендігі белгілі. Ал қауіпсіздік – баршаға ортақ талап. Осы орайда ұлттық компания бойынша өткізіліп жатқан «Заң мен тәртіп» қағидаты аясында «Қауіпсіз өткел» республикалық алдын алу акциясына атсалысудамыз. Іс-шара барысында жүргіншілерге теміржол мен өткелдерден өту кезіндегі қауіпсіздік ережелерін сақтау қажеттігін еске салдық. Әсіресе жол белгілерінің, бағдаршамдар мен дыбыстық сигналдардың талаптарын сақтауға, сондай-ақ жолдардың тек белгіленген жерлерден өтуіне ерекше назар аударылды. Сол тәрізді жүргізушілер сауалына да жауап бердік, – дейді Мырзабек Мырзатайұлы.
Жалпы, акция аясында 278 тұрғын мен 123 автокөлік жүргізушілеріне жадынамалар таратылған. Осыған дейін рейд Аягөз өңірінде өткізілсе, алдағы уақыттарда Белағаш, Семей және Дегелең станцияларына қарасты теміржол өткелдерінде ұйымдастырылатын болады.
