Тарихы терең Түрксіб

Түркістан – Сібір теміржолының қазығы қағылған бұрынғы Луговой, бүгінгі Түрксіб станциясында жаңартылған вокзал пайдалануға берілді. Бұл келер жылы аталып өтетін ұлы құрылыстың жүз жылдығына лайықты тарту болмақ.

Мемлекет басшысының теміржол вокзалдары мен олардың инфрақұрылымын жаңарту және абаттандыру жөніндегі тапсырмасы аясында «ғасыр құрылысының» түп қазығы саналатын тарихи станцияға жиналғандар жаңа вокзалдың лентасын қиып, ақ жаулықты аналар шашу шашты. 1927 жылы салынған Түрксіб станциясының вокзалы екі қабатты, ауданы 1273,6 шаршы метрді құрайды. Вокзалдың орташа тәуліктік жолаушылар ағыны 300 адамнан асады.  

Жамбыл магистральдық желі бөлімшесі директорының вокзал шаруашылығы бойынша орынбасары Азизхан Қалыбаевтың айтуынша, жаңғырту жұмыстарының нәтижесінде вокзал ғимараты заманауи талаптарға сәйкестендіріліп, инженерлік жүйелері толық жаңартылған. Ғимараттың сыртқы және ішкі келбеті жаңарып, жолаушыларға арналған күту залы мен қызмет көрсету аймақтары заманауи үлгіде жабдықталған. Сонымен қатар мүмкіндігі шектеулі азаматтардың вокзал аумағында кедергісіз қозғалысы үшін барлық қажетті жағдай жасалған. Ерекше жандарға және кішкентай сәбиі бар аналарға арнайы күту бөлмелері де қарастырылған. Перрон қайта жасалды, іргелес аумақ абаттандырылды.  

Вокзалдың ашылу салтанатына қатысқан Жамбыл облысының әкімі Ербол Қарашөкеев жаңарған вокзал өңірдің транзиттік және туристік тұрғыда дамуына үлес қосарына сенім білдірді.  

– Түрксіб – еліміздің теміржол тарихымен тығыз байланысты, сондықтан бұл вокзалдың жаңғыртылуы тарихи нысанды сақтап қана қоймай, оны қазіргі заман талаптарына бейімдеудің нақты үлгісі. Ғасырлық мерейтой қарсаңында вокзалдың жаңарып, заманауи талаптарға сай халық игілігіне берілуінің символдық мәні зор. Бұл – өткенге көрсетілген құрмет, бүгінгі ұрпақтың еңбегі және болашаққа жасалған берік қадам, – деді облыс әкімі.  

Бүгінде станция арқылы 20-дан астам республикаішілік, қалааралық және халықаралық жолаушылар пойызы қатынайды. Пойыздар Алматы, Астана, Тараз, Шымкент, Түркістан, Қызылорда, Семей, Павлодар, Петропавл, Көкшетау, Ақтөбе, Атырау және Маңғыстау бағыттарын қамтиды. Ал халықаралық бағытта Алматы – Саратов, Қазан – Бішкек, Бішкек – Мәскеу және Шу – Бішкек пойыздары өтеді.