Жасөспірімнің әрекетінен электровозға 500 мың теңге залал келді
"Қазақстан теміржолшысы" газетінің Жамбыл облысындағы меншікті тілшісі
Оқиға Талас – Тараз учаскесінің 3516 шақырымында түнгі сағат 22.20 шамасында орын алған. Жас жеткіншек №2877 жүк пойызын тартып келе жатқан электровозға тас лақтырып, салдарынан теміржол көлігіне шамамен 500 мың теңге көлемінде материалдық залал келді.
Тіркелген факті бойынша Тараз станциясындағы Көліктегі полиция бөлімі қызметкерлері жедел іздестіру іс-шараларын жүргізіп, бұзақылықты 16 жастағы А. есімді жасөспірім жасағаны анықталған.
– Аталған дерек бойынша ҚР Қылмыстық Кодексінің 202- бабы бойынша қылмыстық іс қозғалды. Сонымен қатар кәмелетке толмаған баланың заңды өкіліне қатысты ҚР Әкімшілік құқық бұзушылық туралы Кодексінің 127-бабы бойынша әкімшілік хаттама толтырылып, 43 250 теңге көлемінде әкімшілік айыппұл салынды. Келтірілген материалдық залалды өндіріп алу мақсатында жинақталған іс құжаттары азаматтық сотқа жолданды. Жас жеткіншектің ойынынан теміржол көлігіне зақым келіп, қаншама шығын әкелді. Ата-анасының қалтасына да салмақ салып отыр. Бұл жағдайдан үлкендер де, жасөспірімдер де сабақ алуы тиіс! Ата-аналарға күндіз де, түнде де балалардың теміржол маңында қараусыз жүруіне, пойыздарға тас және басқа да заттар лақтыруға тыйым салыңыздар деп ескертеміз, – дейді Тараз станциясындағы Көліктегі полиция бөлімі әкімшілік полиция бөлімшесінің бастығы полиция аға лейтенанты Сералы Кембаев.
Әрине кінәлілер қолданыстағы заңнамаға сәйкес әкімшілік немесе қылмыстық жауапкершілікке тартылып, келтірілген залалды өтейді.