Таразда болашақ теміржолшыларға қауіпсіздік ережелері түсіндірілді
"Қазақстан теміржолшысы" газетінің Жамбыл облысындағы меншікті тілшісі
Жамбыл магистральдық желі бөлімшесіне қарасты ЭЧ-21 – Жамбыл электрмен жабдықтау дистанциясының қызметкерлері Тараз теміржол көлік және коммуникация колледжінде «Темір жол – қауіптілігі жоғары аймақ» тақырыбында кездесу ұйымдастырды.
Өндірістік-тәжірибелік сабақ форматында өткен кездесуде Жамбыл электрмен жабдықтау дистанциясының бас инженері Нұржан Атыхаев, еңбекті қорғау және электр қауіпсіздігінің жетекші инженері Бахтыгүл Арқабай еңбекті қорғау мәселесінің маңызына тоқталып, темір жолда орын алған жазатайым оқиғалар бойынша талдау жүргізді. Әсіресе шойын жол бойындағы контактілі желіге жақындамау керектігін ескертті.
Бас инженер Нұржан Көшкінбекұлы болашақ сала мамандарына қауіпсіздік ережелерін түсіндірді. Ең бірінші кезекте контактілі желінің тіректеріне және металл конструкцияларға шығуға қатаң тыйым салынатынын еске салды. Жерде жатқан немесе салбырап тұрған электр сымдарына 2 метрден артық жақын келуге және оларды ұстауға, контактілі желінің қауіпті аймағына кіретіндіктен, жүк вагондарының немесе цистерналардың төбесіне шығуға болмайтынын түсіндірді.
– Қауіп аяқ астында, байқаусызда жерде жатқан сымды басып кетіп, ол тоқ көзінен ажыратылмаған, үзілген электр сымы болуы мүмкін. Сондықтан темір жол сынды қауіпті аймақта ақырын жүріп, анық басқан абзал, – деді бас инженер.
Өз кезегінде Бахтыгүл Тұрарқызы өндірістегі қауіпсіз еңбек ортасын қалыптастыру жолдарына, жас мамандар есте сақтауы тиіс ережелерге тоқталды.
Сондай-ақ мамандар студенттерге теміржол бойында тәртіп бұзып, жолды белгіленбеген жерден кесіп өтудің салдары заңда көзделгендей, алдымен ескерту жасауға, соңынан әкімшілік айыппұл салуға әкеп соғатынын жеткізді.