Көкшетауда теміржол вокзалын қайта жаңарту аяқталды
Ақмола облысында 1981 жылы салынған Көкшетау станциясының теміржол вокзалын қайта жаңарту аяқталды. Жұмыстар Мемлекет басшысының тапсырмасы бойынша іске асырылып жатқан еліміздің теміржол вокзалдарын жаңғырту бағдарламасы шеңберінде жүргізілді, деп хабарлайды Rail-news.kz.
Жоба Қазақстан Республикасы Үкіметінің, Көлік министрлігінің, «Самұрық-Қазына» АҚ және Ақмола облысы әкімдігінің қолдауымен «Қазақстан темір жолы» ҰК» АҚ-ның өз қаражаты есебінен іске асырылды.
Қайта құру барысында жертөле және техникалық қабаттары бар үш қабатты вокзал ғимараты жаңартылды.
Қайта жаңартудан кейінгі ғимараттың ауданы 9 345,4 шаршы метрді, конкорстық өткел ауданы 884,85 шаршы метрді құрады.
Фиброцемент тақталарынан жасалған қасбеті жаңартылып, берік, отқа төзімді және оңай жуылатын материалдарды қолдана отырып, ішкі әрлеу жасалды. Эскалатор, тік көтергіш, жиһаз және қажетті жабдық орнатылған. Сондай-ақ инженерлік желілер жаңартылып, аумақ абаттандырылды және төрт жолаушы лифті бар конкорс өткелі салынды. Қазақстандық өндірістің материалдары қолданылды. Өрт қауіпсіздігі талаптарына сәйкес жаңа эвакуациялық жолдар мен есіктер ұйымдастырылды.
Көкшетау вокзалы 1-класқа жатады. Орташа тәуліктік жолаушылар ағыны шамамен 1800 адамды құрайды. Станция арқылы Көкшетауды Астана, Алматы, Петропавл, Бурабай курорты, Қостанай, Қарағанды, Қызылорда, Орал, Ақтөбе, Атырау, Шу, Түркістан, Шымкент және Тараз, сондай-ақ Қырғызстан және Ресеймен байланыстыратын 32 жолаушылар пойызы өтеді.
Жаңартылған вокзал жолаушыларға жайлылықтың, қауіпсіздіктің және қызметтердің қолжетімділігінің заманауи деңгейін қамтамасыз етеді, сондай-ақ өңірдің көліктік тартымдылығын арттырады.
