Ескертулер ескерілді

Жамбыл өңірінде үш тораптық станция бар. Солардың бірі – Сарышаған. Ай сайын болып тұратын тораптық кеңестің кезекті жиыны жуырда Сарышаған станциясында да өтті.  

Биылғы он айдың қорытындысы мен бір айлық кезең ішіндегі эксплуатациялық көрсеткіштер қаралып, жан-жақты сараланған жиынға «ҚТЖ» ҰК» АҚ филиалы – «Жамбыл магистральдық желі бөлімшесі» бас инженері Жұмағали Урсаров, «ҚТЖ» ҰК» АҚ филиалы – Жамбыл жүк тасымалы бөлімшесі директорының автоматтандырылған басқару жүйесі жөніндегі орынбасары Марат Мырзағұлов, Жамбыл өңірі кәсіподақтар комитетінің басшысы Жұман Сәменов және филиалдың ревизорлық аппарат өкілдері қатысты.

 Филиал директорының орынбасары Марат Мырзағұловтың төрағалығымен өткен кеңесте Сарышаған тораптық станциясы аумағына жақын орналасқан станциялар басшылары мен өзге де жауапты мамандары бір ай ішіндегі жақсы көрсеткіштер мен кеткен кемшіліктерді баяндады. Жиыннан ұққанымыз биыл машинистердің болат жолдың сапасы мен өзге де орын алған олқылықтар жөніндегі «Ескертпелер кітабына» түртіп алған ескертпелері азая түсіпті.

– Қыркүйек айында машинистерден 92 ескертпе келіп түссе, қазан айында 84 тіркелді. Жалпы, өткен жылдың осы есепті кезеңіндегі ескертпелер саны 120-ға жеткен. Яғни, қойылған талаптар мен жылдан жылға жол сапасының жақсарып келе жатқанының арқасында орын алып жатқан олқылықтар динамикасы биыл азая түскен. Бұл – біз үшін жақсы жаңалық, – дейді Марат Болатбекұлы.

Сондай-ақ, кеңесте жол қауіпсіздігі мен еңбекті қорғауды қамтамасыз ету мәселелері де басты назарға алынып, өткен айдың кеңесінде қаралған ескертпелер бойынша да жауаптар алынды. Өйткені, тәуекелі басым темір жол саласындағы еңбек қауіпсіздігі мен оның қорғалуы, қызметкерлердің денсаулығы басты бағыт екені анық.

Жасұлан СЕЙІЛХАН, Жамбыл