Семей теміржолшылары үздік бастауыш партия ұйымы атанды
Өскемен қаласында өткен «Нұр Отан» партиясы аймақтық филиалының ХХІ есеп беру-сайлау конференциясында Семей ЖТ бөлімшесінің бастауыш партия ұйымы «Ең үздік БПҰ-2018» байқауының облыстық кезеңінің жеңімпазы деп танылды, деп хабарлайды "Қазақстан теміржолшысы" газетінің өңірдегі тілшісі.
Аталмыш салтанатты шараға «Нұр Отан» партиясы фракциясы бойынша қалалық мәслихаттың депутаты, Семей ЖТ бөлімшесінің басшысы Марлен Көкірекбаев бастаған теміржолшылар қатысты. Екі жыл бойғы атқарылған жұмыстардың қорытындысына арналған шарада, партияның аймақтық филиалы төрағасы-облыс әкімі Даниал Ахметов «Қазақстан-2021: Бірлік. Тұрақтылық. Жасампаздық» атты партияның сайлауалды бағдарламасы аясында ең белсенді жұмыс жүргізген ұжым ретінде семейлік теміржолшыларды атап өтіп, Марлен Көкірекбаевқа салтанатты түрде бірінші орын иегерлері екендігін айғақтайтын диплом табыс етті. Оның өзіндік себебі де жоқ емес, осынау аралықта партия қатарына өткен теміржолшылар саны еселеп өскен. Сонымен қатар, жергілікті халықтың өтініш-тілегі аясында бастауыш партияның атқарған жұмыстары да орасан. Оның ішінде, жергілікті елді мекендерді ауызсумен қамту, көктемгі су тасқынынан зардап шеккен тұрғындарға материалдық көмек беру сынды көптеген игілікті шаралар бар.
– «Нұр Отан» халықтың партиясы, сол себепті жұртшылықты толғандырған мәселе біздің де назарымызда. Ал осынау міндетті орындаудағы басты құрал қоғамдық қабылдаулар болып отыр. Оның аясында шешімін тапқан мәселелер өткен жылғыдан да көп. Ең бастысы жергілікті халықтың тілегін орындау партияның қызметі мен беделін арттыра түспек, – дейді бөлімше басшысы Марлен Кәрімұлы.
Атап өтерлігі, қазіргі күннің өзінде темір жол саласы қызметкерлері арасында партия қатарына өтуге ниет білдірушілер саны көп екен.
Қуаныш Қожаев, Семей