Жаңа телім бойында
Қызылорда магистральдық желі бөлімшесіне қарасты Сексеуіл жол дистанциясы – Жезқазған-Сексеуіл магистралі ашылған жылы «өмірге» келген ең жас дистанциялардың бірі. Соған қарамастан мекеме ұжымы өзіне міндеттелген міндеттерді мінсіз атқарып, пойыздардың қозғалыс қауіпсіздігін сақтауға жұмыла жұмыс істеп отыр.
Жолшылар қауымы пойыздардың қозғалысына нұқсан келтіретін оқиғаларды болдырмауға, алдын алуға тырысып бағуда. Десе де, дистанция бойынша биылғы үш тоқсанда қараусыз малдың жолға шығып кетуіне, бөгде адамның жол бойында жүруіне, тағысын тағы келеңсіз жайттарға байланысты тепловоз машинистерінің жедел тежегішті қолдануы 49 рет тіркелген.
– Мал-жанның пойызға басылуын болдырмау үшін дистанция жолшылары профилактикалық жұмыстарды тұрақты жүргізіп келеді. Тіпті, жол бойына жақын орналасқан ауылдық округтерге, аудандық әкімдікке қатынас хаттар жазылып, арнайы мамандар құрамымен рейд ұйымдастырылды. Сөзіме дәлел ретінде, сексеуілдік жолшылардың Арал аудандық әкімдігіне, Қарақұм, Шижаға ауылдық округі және Сексеуіл кенті әкімдігіне теміржолдың қауіпті аймақ екендігін, оның бойында мал бағу мен бейсауыт жүру қауіпті екені түсіндірілген мәтінмен 35 рет хат жолдағанын айтар едім. Өкініштісі, оң нәтижеге қол жеткізе алмай отырмыз. Жаңа телімнің ең қауіпті аумағы болып саналатын Қарашеген-18 бекет, 17 бекет маңында иесіз жайылған малдың әсерінен пойыз машинистерінің жедел тежегіш басуы жиі қайталануда, – дейді дистанция бастығы Мәжит Құрманбаев.
Нақты деректерге жүгінсек, дистанция жолшылары теміржолдың аса қауіпті аймақ екенін түсіндіріп, мектептерде 2730 оқушымен, 1889 жергілікті тұрғынмен 22 мәрте кездесу өткізіпті. Жол бойын жағалай арнайы жұмыс тобымен 20 рет рейд өткізген. Өтіп бара жатқан пойыздардың терезесіне тас лақтырып сындыру, жолға бөгде зат қою жағдайының алдын алу үшін Абай, Шижаға ауылында, Сексеуіл және Арал теңізі станцияларындағы мектептердің 676 оқушысымен кездесіпті.
«Әлбетте, біз «баяғы жартас – бір жартас» деп қол қусырып отыра алмаймыз. Профилактикалық жұмыстар шеңберінде темір жол бойына малдың шығып кетпеуі үшін қоршаулар орнатудамыз. Мәселен, 2016 жылы Сексеуіл-Қоскөл жаңа телімінің бойын малдан қорғау үшін 25 шақырымдық аумақтың екі қапталы қоршалса, 2017 жылы – 67 км, ал биылғы жылы 20 шақырымды қоршау жұмыстары жүргізіліп жатыр» , – деген жол мекемесі бастығы дистанция телімдеріндегі 15 теміржол өткелінің 4-еуі күзетілетінін, ал қалған 11 өткел қарауылсыз екенін атап өтті. Дегенмен, күзет қойылмаған өткелдерге әр айда екі рет рейд ұйымдастырылады екен, биыл осындай 64 рет рейд ұйымдастырылып, 1965 автокөлік жүргізуші өткелден өту тәртібімен таныстырылған. Және де дистанция басшылығы арнайы мамандар тобымен жоспардан тыс тексерулер ұйымдастырып, 62 кемшілік тауып, оларды дер кезінде түзетуді бақылауға алған.
Сабырхан НӘДІРБАЕВ, Қызылорда