Семей магистральдық желі бөлімшесінде өндірістегі қауіпсіздік бойынша семинар өтті
Жуырда Семей магистральдық желі бөлімшесінде өндірістегі қауіпсіздік ережелерін сақтау мәселелері жөнінде арнайы семинар болып өтті. Мақсат – адами факторлар бойынша қауіпсіздікті сақтауда тың табысқа жету.
Аталмыш бағытта ұйымдастырылған тренинг бірінші кезекте еңбекті қорғау инженерлеріне арналды. Басқосу барысында сала мамандары жұмыс орындарындағы бақытсыздық жағдайларының алдын алу бойынша ұлттық компания көлемінде қолға алынған тың әдістемелік шаралармен танысты. Атап айтсақ, микротравмалар мен ауыр травматизмге ұрындырар ахуалдардың алдын алу бағытындағы атқарылуы тиіс жұмыстар мен ережелерге қанықты.
– Бұл жолғы жиын барысында өндірістегі қауіпсіздіктің 12 ережесі туралы кең көлемде мағлұмат берілді. Біздің мақсатымыз – жарақатсыз еңбек ету, ережелерді сақтау, тәртіп пен тиянақты жұмыс істей отырып, өндірісте теміржолшы өміріне төнер қауіп-қатерге жол бермеу, – дейді НЖС-6 бойынша еңбекті қорғау бөлімінің жетекші инженері Жомарт Шапишев.
Жиналғандар өндірістік травматизмге себеп болатын жағдайлармен кеңінен танысып, жұмыс орнындағы қауіпсіздікті сақтау мақсатында орындалуы тиіс нормативтік ережелер жөнінде тың түсінік алды. Сондай-ақ, осы бағытта ұлттық компания бойынша өткен жылдың статистикалық мәліметтеріне де қанықты.
Өндірістік қауіпсіздік саласына жауапты мамандар сөзіне сүйенсек, ендігі аралықта бөлімше нөлдік травматизм бойынша арнайы әзірленген өзіндік бағдарлама аясында кең көлемде жұмыс жүргізбек. Ал оның аясында алдағы уақыттарда бақылау жұмыстары, семинарлар, озат еңбеккерлер үлгісін, еңбекті қорғау бойынша кәсіпорындардағы үздік іс-тәжірибелерді насихаттау сынды танымдық шаралар ұйымдастырылатын болады.
Қуаныш Қожаев, Семей