Түбек тынысымен танысты
«ҚТЖ-Жүк тасымалы» АҚ басқарма төрағасының орынбасары Мұхтар Махамбет, Тасымалдау үдерісін үйлестіру департаментінің директоры Алпамыс Балғынбеков және жедел-нұсқау бөлімі бастығының орынбасары Шыңғыс Мерғалым Маңғыстауға барып, түбек теміржолының бүгінгі жай-күйімен танысты.
Маңғыстау жүк тасымалы бөлімшесін ақпанның 11-13 аралығында аралаған олар осы іссапар шеңберінде диспетчерлік аппарат жұмысын, оның заманауи техникалық жабдықталуын, “Қазтеміртранс” АҚ филиалының диспетчерлік жұмысын, АСУ ДКР жүйесі қызметін көріп, Маңғыстау торабы жұмысшылары мен басшыларының қатысуымен пойыздар қозғалысының қауіпсіздігін талқылау жөнінде тораптық жиын өткізді, сонымен қатар логистикалық-инфрақұрылымдық нысандары, атап айтқанда, Ақтау теңіз сауда порты, Құрық портының паром кешені, "Ақбидай" және "Солтүстік" астық терминалдарын аралады. Тораптық жиында 2018 жылдың қорытындысы және биылғы жылға жоспар құру, пайдалану көрсеткіштерінің орындалуы сөз болды.
– Жалпы 2018 жыл компаниямыз үшін табысты жылдардың бірі болды, жүк тасымалдау көрсеткіштерінің нәтижелері жақсы деп айтуға болады. Бірақ жұмыс барысындағы жіберілген қателіктер мен кемшіліктер бар, әсіресе қауіпсіздік бойынша орын алған кемшіліктер. 2017 жылдың көрсеткішіне қарағанда былтыр кем-кетік 33 пайызға азайған, дегенмен адам факторының кесірінен, яғни дұрыс жұмыс жасамау, жұмысқа салғырттық кемшіліктерді көбейіп отыр, – деді Алпамыс Балғынбеков.
Қауіпсіздік туралы сөз етсек, адамдардың жолға шығып кетуіне байланысты орын алатын оқыс жағдай, бақытсыз оқиғалар Алматы, Жамбыл және Шымкент бөлімшелерінде көп байқалады екен, оның бірден-бір себебі халықтың тығыз орналасуы, халық санының көп болуы, тұрғын үйлердің темір жолға жақын болуы немесе оқушылардың мектепке қатынауы кезінде темір жолды кесіп өтуінен деген тұжырым жасалуда.
Іссапар қорытындысында бөлімшенің тиімді жұмысын арттыру жөніндегі ұйымдастырушылық техникалық шаралар кешені жасалды. Бөлімше жұмысына оң баға беріліп, алдағы уақытта бизнес үдерістерді жақсарту бойынша ұсынымдар айтылды. Сонымен қатар жиналыс қаулысымен құрылымдық бөлімшелердің басшыларына «ҚТЖ» бойынша тасымалдау процесі кезінде пойыздар қозғалысы қауіпсіздігін, еңбекті қорғау және техника қауіпсіздігін қамтамасыз ету, орталық аппараттан келіп түскен бұйрықтарды уақытылы орындау тапсырылды. Ал бөлімше басшыларына 2018 жылдың көрсеткіші бойынша анықталған дизель отынын шамадан артық пайдалану 2019 жылы қайталанбауы үшін жұмыс жүргізу, тапсырыс берілген тепловоздар 2 сағаттан артық тұруын болдырмау үшін диспетчерлік аппаратпен қатаң түрде жұмыс жасау, рейстік және варианттық пойыздарын уақытылы жүргізу, локомотивтік паркті өз көлеміне қарай пайдалану, аз локомотивпен көп жұмыс жасау, «Машинистердің ескерту кітабы» бойынша тіркелген кемшіліктермен жұмыс жүргізу, машинистердің жағдайына, жұмысқа шығуына және еңбек қорғау бойынша көңіл бөлу, әрбір локомотив сағатын санап, локомотивтердің техникалық жағдайын үнемі бақылауға алу міндеттері жүктелді.
Ұлан ОРАЗ