Достық жолы күрделі жөндеуден өтуде

Биылғы жылы Алматы магистральдық желі бөлімшесінде 94 км астам көлемде күрделі жөндеу жоспарланған. Мердігерлік тәсілмен атқарылатын жөндеу жұмысы басталып та кетті. Жуырда «Теміржол жөндеу» ЖШС Астана жол машиналары станциялары және «IntegraConstructionKZ» ЖШС «Оңтүстік дирекциясына» қарасты Үштөбе жол машиналары станциялары жұмысқа кірісті.

Алматы магистральдық желі бөлімшесінің директоры Талғат Еспановтың айтуынша, жол табанын сауықтыру жыл сайын үздіксіз жүргізіліп келеді. Мақсат – темір жолдың сенімділігін арттырып, пойыздар қозғалысы қауіпсіздігі деңгейін көтеру, сондай-ақ техникалық құралдардың істен шығуын азайтып және алдағы қыс маусымына дайындық та осы күрделі жөндеудің сапасына байланысты көрінеді. – Жалпы жол шаруашылығын сауықтыруға көңіл бөлініп, кешенді іс-шаралар қолға алынуда, күрделі жөндеудің кезінде барлық өткелдерді де ретке келтіріп, кем-кетігін түзеуді көздеп отырмыз, – дейді Талгат Еспанов. Ал күрделі жөндеу көп күттірмейді.

Алдын ала әзірленген кестеге сәйкес, Ақтоғай–Достық – Рзд-19 аралығындағы 284-310 км жолға бірінші кезек келіп, бүгінгі таңда 24,692км көлеміндегі күрделі жөндеу қарқынды жүріп жатыр екен. Барлық жөндеу жұмысын Үштөбе ЖМС атқаруда. Кәсіпорын жолдың үстіңгі қабатын түгелдей сөгіп алып, су жаңа материалдар төсеп жатыр. Ол үшін қажетті техникалары жеткілікті. Мысалы, рельс-шпалдарды жинап және төсейтін УК-25/9-18 және ЭЛБ электробалластерін пайдалану арқылы жол астындағы щебень балласын, қиыршық тастарды өте жақсы тазартып, жолды түзетіп, тегістеп, ажарлауға болады. Щебеннің жалпы көлемі 75,789 м³ құрайды. Бүгінгі күннің өзінде 11 технологиялық «толаскез» өтіп, 14,095 км рельс-шпалды торкөз салынып, 4,688 км бунағы төселіпті. 

Ал Астана ЖМС мердігер кәсіпорны жүргізіп жатқан екінші күрделі жөндеу Саяқ–Ақтоғай телімінің Рзд-3– Жақсыбұлақ аралығындағы 1498-1523 км нүктесінде жүріп жатыр. Мұнда 24,174 км көлемде күрделі жөндеу жүргізу көзделген. Шілдеге дейін жұмыс түгел аяқталып пайдалануға берілуі жоспарланған. Мамыр айының соңына дейін 10 км жол төселмек. Ал маусымда 10 км, шілдеде 4, 174 км жол төселеді деп есептеп отыр мердігер компания.

Барлық техника жарақты, жүріп тұр, жөндеу жұмысы басталғалы бері мұнда да 7 рет «толаскез» өткен, олардың әрқайсысы 6 сағатқа созылған. Бүгінгі таңда 6,6 км рельсшпалды торкөз төселген.

– Биылғы күрделі жөндеу есебінен біз Достық жолын сауықтырып алуды көздеп отырмыз. Өйткені, Қытайға жол ашатын осы Достық – Ақтоғай – Саяқ аралығы көп жылдан бері күрделі жөндеу көрмей тозып келе жатқаны рас еді. Оның үстіне, осыдан 15-20 жыл бұрынғы көрсеткішпен салыстырғанда телімде қозғалыс қанша есеге өсті, оны жүк тасымалының, Қазақстан мен Қытай арасында ағылып жатқан транзиттік пойыздар көлемінен-ақ байқауға болады. Сондықтан, Достық жолына күрделі жөндеу қажет еді, – деп ақпар берді Алматы магистральдық желі бөлімшесінің директоры Талғат Еспанов.