Атыраулық локомотившілер жазғы маусымға дайындықты бастады
Атырау облысы бойынша меншікті тілші
Локомотивтерді жазғы маусымға дайындауға атыраулық локомотившілер белсене кіріскен. Айталық, биылғы көктемгі комиссиялық тексеруге локомотив пайдалану паркіндегі 26 тепловоздың 16-сы жатқызылып, бүгінде оның 15-і тексеруден өткен.
Тексеруге жатқызылған локомотивтердің 9-ы магистральдық, 4 маневрлік және 3-уі жолаушы тепловозы. Олар Мақат сервис орталығында жөнделеді. Сонымен қатар, көктемгі тексеру кезінде локомотив бригадаларымен тепловоздардың сыртқы келбетін сәнге келтіру, 21 тепловозды, оның ішінде машинист кабиналарының кейбір жерлерін, поликтерді техника және өрт қауіпсіздігі талаптарына сәйкес сырлау, қысқы майды жазғысына ауыстыру, аккумуляторлардың жарамдылығын тексеру сияқты тағысын тағы ағымдық жұмыстар жүргізілген. Депоның жөндеу-бақылау бөлімінің бастығы Нұрлан Қорғанбаевтың айтуынша, тұтастай алғанда тепловоздар «жақсы» деп бағаланып, нәтижесі 4,5 балды құраған.
«Машинистердің жұмысы тепловоздардың техникалық жағдайына тікелей байланысты. Сондықтан жөндеу жұмыстарынан өткен локомотивтерді қабылдауда мұқияттылық керек. Локомотивтердің қозғалысына, жүріп тұруына жол жағдайы да ықпал етері анық. Осы ретте, қазір өңірдегі жолдардың бұрынғыдан жақсарып қалғанын айтар едік. Атырау-Ақсарай арасында жөндеу жұмыстары жүргізілді. Бұрын сағатына 60 шақырымдық жылдамдықпен жүретін едік, енді оны 100-ге дейін арттыруға мүмкіндік бар. Сол секілді Сағыз, Құлсары, Бейнеу бағытындағы жолдар да жақсарып келеді, бірақ әлі де жылдамдықты шектейтін тұстары бар екенін айтпасқа болмас», – дейді Нұрлан Қорғанбаев.