Қауіпсіздікке қосқан үлесі құрметке лайық
Атырау облысы бойынша меншікті тілші
Пойыздар қозғалысының қауіпсіздігін сақтау – барлық теміржолшыларға ортақ міндет. Алайда оған салғырт қарайтындар да, өз ісіне аса жауапкершілік танытып, ақауды мүлт жібермейтін қырағы көз майталмандар да бар.
Жуырда Атырау жүк тасымалы бөлімшесінде жылжымалы құрамдардың ақауын тауып, қауіпсіздіктің сақталуына қомақты үлес қосқан екі маман марапатталды. Атырау станциясының 8-ші жолында түнгі сағат 03:36 минутта келіп тұрған пойызға техникалық қызмет көрсету кезінде вагон қарап-жөндеуші Берік Қисықов доңғалақ буксының 23 милиметрге ығысып кеткенін дер кезінде анықтаған, ол қалыпты 1,5 мм-ден әлдеқайда артық болған. Сондықтан дереу қақпақты ашып, бұранданы ағытып қарағанда ішіндегі темірдің сынып, майы қарайып кеткені анықталған. Вагон ақаулы деп танылып, Атырау депосына техникалық ағытып-жөндеуге жіберілген.
Бәйтерек бекетінде де келеңсіз жағдай орын алды. Кешкі сағат 18:00 шамасында бекет ғимаратының релелік құрал-жабдықтары орнатылған бөлмесінен түтін шыққан. Сол күнгі бекет кезекшісі Әділет Нұрлыбекұлы жас маман бола тұра, ғимарат бөлмесінен шыққан түтінді дер кезінде байқап, асыпсаспай, салқынқанды қимылдай білген. Ол алдымен нұсқама бойынша тоқтарды ажыратып, өрт сөндіру құралын орынды пайдаланып, түтіннің үлкен өртке ұласуына жол бермей, ғимаратты өрттен аман алып қалды. Және тиісті мамандарға хабар беріп, пойыздар қозғалысы қауіпсіздігін сақтап, лауазымдық міндетін дұрыс деңгейде орындай білді.
Атырау жүк тасымалы бөлімшесінің басшысы Мағауия Оразқұлов екі жігітке де алғыс айтып, оларды «ҚТЖ» ҰК» АҚ Басқарма төрағасы Сауат Мыңбаевтың атынан «Қозғалыс қауіпсіздігі үшін» төсбелгісімен марапаттап, алдағы еңбектеріне табыс, отбасыларына амандық тіледі.