Білім деңгейіне сынақ
Қызылорда облысы бойынша меншікті тілші
Аймақ теміржолшыларының кәсіби міндетін мінсіз атқаруын қадағалау мақсатында бөлімше басшылығы мен әр мекеменің басшы-қосшылар тарапынан да жұмысты бақылау тұрақты жүргізіліп, пойыздардың қозғалыс қауіпсіздігін сақтауға қашан да бірінші кезекте мән беріліп келеді.
Жуырда Жалағаш станциясына барғанымызда Қызылорда ЖТ бөлімшесінің техникалық бөлімінің бастығы Жарқынбек Рсымбетов, бөлімшенің қозғалыс қауіпсіздігі бөлімінің басшысы Бекжан Өтеулиев және техбөлімнің еңбек қорғау және техқауіпсіздік жөніндегі маманы Ғабит Тілеубаев станция теміржолшыларының білімін тексеру сынағынан өткізіп жатқанына куә болдық.
Жалағаш станциясына маңайдағы Қараөзек пен Қызылтам станциялары арасындағы шағын бекеттерден станция кезекшілері, белгі берушілер, пойыз құрастырушылар, парк кезекшілері, жалпы алғанда әр бекеттің жұмысына жауапты 20 шақты теміржолшы жиналған екен. Бұл тексеру Ұлттық компаниядан жеткен телеграфтық пәрменге орай бөлімше басшылығы тарапынан жасақталған комиссиялық құраммен өткізілуде.
– «ҚТЖ-ЖТ» АҚ өндірістік қауіпсіздік жөніндегі атқарушы директоры А. Құрақбаевтың 05.08.2019 ж. телеграфтық пәрмені негізінде жоғарыда аталған станция теміржолшыларының ПТЭ, ИСИ, ИДП және пойыздардың қозғалыс қауіпсіздігі ережелерінің меңгеруін тексерудің кешенді-жоспарлы шаралары өткізілуде. Шара барысында теміржолшылардың пойыздардың қозғалыс қауіпсіздігін сақтауды арттыру, қауіпсіздіктің бұзылуының алдын алу және орын алған кемшіліктердің қайталанбауына күш салуы мақсатында кешенді сынақ бекітілген болатын. Осыған байланысты бүгін Жалағаш станциясына Қаракеткен мен Қызылтам арасындағы бекеттердің теміржолшыларының білімін тексеру жұмыстарын жүргізудеміз, – деді бөлімшенің қозғалыс қауіпсіздігі бөлімінің басшысы Бекжан Өтеулиев.
Бөлім басышысының айтуынша білім тексеру сынағынан бекеттерден жиналған теміржолшының бәрі дерлік өтіп, жұмысын жалғастыруға рұқсат алған. Дегенмен аса қауіпті саналатын аймақта жұмыс жасайтын теміржолшылар үшін қауіпсіздікке аса мұқият болу – ең басты қағида, сондықтан оны сақтау және өзгелердің де сақтауын талап ету әрбір теміржолшының кәсіби міндеті екені сынақ тапсырушыларға тағы да ескертілген.